Author: Nishkarsha News

दमक/ पार्टी अध्यक्ष केपी शर्मा ओलीको गृह जिल्ला झापाका ५ मध्ये ४ निर्वाचन क्षेत्रमा नेकपा एमालेको ११ औँ राष्ट्रिय महाधिवेशनका लागि भएको प्रतिनिधि छनोट निर्वाचनको मत परिणाम सार्वजनिक भएको छ ।
शनिबार भएको ४ क्षेत्रको निर्वाचनको मत परिणाम आइतबार बिहान सार्वजनिक भए पनि क्षेत्र नं २ को मत गणना सकिएको छैन ।
सार्वजनिक भएको मत परिणाम अनुसार ओलीको गृह जिल्लामै ओली इतर अर्थात इश्वर पोखरेल पक्षधर महाधिवेशन प्रतिनिधिहरु समेत निर्वाचित भएका छन् ।
क्षेत्र नं ५ मा निर्वाचित भएका ८ महाधिवेशन प्रतिनिधिहरु मध्ये केही महाधिवेशन प्रतिनिधिहरु पोखरेल पक्षधर समेत भएको दाबी भित्रभित्रै सो पक्षले गरिरहेको छ ।
यद्यपी नामै किटेर महाधिवेशन प्रतिनिधिहरुलाई विभाजित गर्न भने नसकिने सो पक्षको तर्क छ ।
क्षेत्र नं ५ बाट निर्वाचित हुने महाधिवेशन प्रतिनिधिहरुमा खुल्ला पुरुष समुह तर्फ सर्वाधिक मत पाउनेमा यस क्षेत्रका अम्बिका प्रसाद खनाल रहेका छन् । उनले १ हजार ५ सय १५ मत पाएका छन् । सो समुहबाट शिवप्रसाद ढुुंगेल , होमबहादुर थापा र तुलसी कार्की महाधिवेशन प्रतिनिधि निर्वाचित भएका छन् ।
क्षेत्र नं ५ मा महिला तर्फ नर्वदा उप्रेती (गौतम) अम्बिका देवी अधिकारी र लीला ढुंगेल (दाहाल) निर्वाचित भएका छन भने युवा तर्फ युवराज पौड्याल निर्वाचित भएका छन् ।
क्षेत्र नं ४ बाट महाधिवेशनमा केन्द्रिय कमिटीमा जाने घोषणा गरेका पूर्व सांसद तथा नेता लालप्रसाद साँवा (एलपी ) सर्वाधिक १ हजार ८ सय ६ मतसहित महाधिवेशन प्रतिनिधिमा निर्वाचित भएका छन् ।
साँवापछि सो क्षेत्रमा शिवसताक्षी नगरपालिकाका मेयर समेत रहेका मेगाहाङ थोप्रा (रोशन)ले १७७३ मत ल्याएर महाधिवेशन प्रतिनिधिमा निर्वाचित भएका छन् । त्यस्तै प्रतिनिधि छनौटको निर्वाचनबाट रविन्द्र लम्साल र हिमबहादुर कार्की, महिला तर्फ कृष्णमाया भुजेल र गोमा रिजाल विजयी भएका निर्वाचन समितिले जनाएको छ । त्यस्तै महाधिवेशन प्रतिनिधिका लागि युवा तर्फ रोशन सुवेदी विजयी भएका छन् ।
झापा क्षेत्र ४ मा ३ हजार ३५५ मतमा २ हजार २ हजार ५८७ मत खसेको थियो । क्षेत्र नं १ मा खुल्लातर्फ राजु पोखरेल, असारु राजबंशी र लक्ष्मी राई निर्वाचित भएका छन् भने महिला तर्फ रमा भण्डारी तथा जानुका ओली र युवा तर्फ दीपक बराल निर्वाचित भएका छन् ।
झापा क्षेत्र नं ३ मा दुई महिलासहित ६ प्रतिनिधि निर्वाचित भएका छन् ।
खुल्ला तर्फ छविलाल चुँडाल, त्रिलोचन सापकोटा र बसन्त बानियाँ निर्वाचित हुँदै गर्दा महिलातर्फ कल्पना रेग्मी र शान्तादेवी खरेल र युवा तर्फ अग्नि प्रसाद सापकोटा निर्वाचित भएका छन् । क्षेत्र नं २ मा भने मतगणना सकिएको छैन ।

 

 

झापा/ नेकपा एमाले झापा क्षेत्र नं ५ मा महाधिवेशन प्रतिनिधि चयनका लागि भएको निर्वाचनको मतगणना जारी छ । अहिले सम्म खुल्ला महिला र युवा कोटाका उम्मेदवारहरु तर्फको मतगणना भइरहेको छ भने खुल्ला पुरुष तर्फको गणना हुन बाँकी छ । महिला तर्फ तीन जनाको लागि भएको निर्वाचनमा ५०० मत गणना हुँदा नर्वदा गौतमले ३२९ मत ल्याएकी छिन भने अम्बिका अधिकारीले २९७ र लीला ढुंगेल दाहालले २५८ मत ल्याएकी छिन् । त्यस्तै पार्वता ढकालले २५६ मत ल्याएकी छिन् ।
त्यसैगरी युवा तर्फ १ जनाका लागि भएको निर्वाचनमा १४०२ मत गणना हुँदा युवराज पौड्याल (विवश)ले ५६२ मत ल्याएर अग्रता लिएका छन भने सुसिल कुमार राईले ३६५ मत ल्याएका छन् ।

दमक/  नेकपा एमालेको आसन्न ११ औं महाधिवेशनका लागि कोशी प्रदेश अन्तर्गतको ताप्लेजुङ जिल्लामा महाधिवेशन प्रतिनिधि निर्विरोध निर्वाचित भएका छन् ।

एमाले सचिव योगेश भट्टराईको गृह जिल्ला ताप्लेजुङमा १२ जना महाधिवेशन प्रतिनिधि निर्विरोध निर्वाचित भएका हुन् ।
ताप्लेजुङमा खुल्ला तर्फ अनन्त बहादुर साँवा, दिपेन्द्र पोमु, छत्रपति प्याकुरेल , घनेन्द्र मादेन, प्रकाश राई र ज्ञानेन्द्र लावती निर्विरोध निर्वाचित हुनुभएको हो । त्यस्तै महिला तर्फ टीका सुवेदी, रनमाया गुरुङ, मिनाकुमारी केदेम र प्रमिला घिमिरे निर्वाचित हुनुभएको छ भने युवा तर्फ गोपाल न्यौपाने र दलितबाट बुद्धिमान नेपाली निर्विरोध निर्वाचित हुनुभएको जनाइएको छ ।

पार्टी अध्यक्ष केपी शर्मा ओलीको निर्वाचन क्षेत्र झापा ५ मा भने महाधिवेशन प्रतिनिधि छनोट सर्वसम्मत हुन सकेको छैन । यस अघि पार्टीको झापा जिल्ला अधिवेशन सर्वसम्मत चयन गरेको एमालेले अध्यक्ष ओलीको निर्वाचन क्षेत्रमानै यस पटक भने महाधिवेशन चुन्नका लागि निर्वाचन गर्न लागेको हो । निर्वाचन समितिले आज साँझ उम्मेदवारहरुको सूची सार्वजनिक गरेपछि भोली १३ मसिंरमा हुने निर्वाचनमा पार्टीका संगठित सदस्यहरुलाई सहभागी गराउन पार्टी नेतृत्व सक्रिय भएको बताइएको छ ।

यस क्षेत्रमा पार्टी संगठनमा क्रियाशील अधिकांश नेताहरुनै महाधिवेशन प्रतिनिधिका लागि चुनावी प्रतिस्पर्धामा उत्रिएका छन् ।
यो क्षेत्रबाट महाधिवेशन प्रतिनिधि (खुल्ला तर्फ ) ४ जनाका लागि १० जना उम्मेदवार प्रतिस्पर्धामा उत्रिएका छन् ।
खुल्ला तर्फ अम्बिका प्रसाद खनाल, उत्तम भट्टराई, तुलसी कार्की, दुर्गाप्रसाद गौतम, नगेन्द्र भण्डारी, बोधप्रसाद घिमिरे, राजकुमार थापा , राजेन्द्र कुमार सुवेदी , शिव ढुंगेल र होमबहादुर थापा महाधिवेशन प्रतिनिधिका लागि चुनावी प्रतिस्पर्धामा छन् । त्यस्तै महिला तर्फ तीन जनाका लागि ७ जना उम्मेदवार प्रतिस्पर्धामा उत्रिएका छन् ।

प्रतिस्पर्धामा उत्रिएका महिला नेतृहरुमा अम्बिकादेवी अधिकारी, कल्पना अधिकारी, देवीमाया श्रेष्ठ, नर्वदा उप्रेती गौतम, पार्वता ढकाल, भगिरथा उप्रेती (तिवारी) र लिला ढुंगेल (दाहाल) रहनुभएको छ । युवा कोटा ( ४० बर्ष उमेर भन्दा कम) तर्फ एक जनाका लागि पाँच जना उम्मेदवार प्रतिस्पर्धामा उत्रिएका छन् ।
युवा पुस्ताको सहभागिता सुनिश्चीत गराउन हरेक निर्वाचन क्षेत्रमा एमालेले ४० बर्ष मुनिको एक जनालाई महाधिवेशन प्रतिनिधि अनिवार्य बनाएपछि युवा उम्मेदवारहरुको संख्या बढेको हो । युवा तर्फ कमल पौड्याल, डेन्जोङ शेर्पा, युवराज पौड्याल (विवश) , सुजन खरेल र सुसिलकुमार राईबीच चुनावी प्रतिस्पर्धा हुनेछ ।