दमक/ आन्तरिक समस्या झेल्दै आएको दमक ८ स्थित दमक हस्पिटल एण्ड रिसर्च सेन्टर प्रालि भित्र आर्थिक अनियमितताको बिषय सतहमा आएको छ ।
प्रतिष्ठित चिकित्सकहरुसहितको टिमको लगानी रहेको सो प्रालिमा २०७६ सालदेखि लगानीकर्ता तथा शेयर सदस्यहरुबीच अस्पताल सञ्चालनमा पारदर्शीताको अभाव देखाउँदै भित्र भित्रै विवाद रहेको थियो ।
पछिल्लो समय ठुला लगानीकर्ता मानिएका प्रालिका अध्यक्ष डा. निराजन भुसाल र अर्का शेयर होल्डर डा. चन्द्रप्रकाश गैरेले अन्य लगानीकर्ताहरुलाई भित्र भित्रै पाखा लगाएर आफूहरुको नाममा मात्रै शेयर कायम गरेको तथ्य समेत खुलेको छ ।
लगानीकर्ताहरुसँग गैरेले शेयर वापत रकम हाल्न लगाएपनि उनीहरुको शेयर कायम समेत नगरेको र हस्पिटलमा असम्बन्धित व्यक्तीहरुका नाममा कम्पनी ऐन नियम र बैंकिङ नियम समेत मिचेर ठुलो रकम कम्पनीको बैंक खाताबाट झिकेर अपचलन गरिरहेको आरोप लागेको छ ।
मोति बराल, नारायण श्रेष्ठ, सुजन खरेलसहित ९ जना लगानीकर्ताहरुले विशेष गरी गैरेले त्यस्तो धन्दा चलाएको प्रमाण समेत सार्वजनिक गर्दै बिहिबार दमकमा पत्रकार सम्मेलन गरेका छन । मंगलबार जिल्ला प्रशासन कार्यालय झापामा डा. भुषाल र गैरे विरुद्ध सामुहिक उजुरी गरेका उनीहरुले दोषीमाथी कारवाही र पीडितहरुमाथी न्यायका लागि सार्वजनिक अपिल गर्दै पत्रकार सम्मेलन गरेका हुन ।
उनीहरुले डा. भुसाल र गैरेले कार्यकारी निर्देशक तेजराज घिमिरे समेतलाई दबाबमा राखेर ३ करोड ४१ लख रुपैयाँ रकम अपचलन गरेको दाबी गरेका हुन ।
अर्घाखाँची स्थायी ठेगाना भएका प्रालिका अध्यक्ष डा. निराजन भुसाल र सञ्चालक डा.चन्द्रप्रकाश गैरेले कम्पनीको बैंक खातामा रहेको रकम अनियमित तवरले विभिन्न असम्बन्धित व्यक्तिहरुका नाममा समेत झिकेर अपचलन गरेको उनीहरुको जिकिर छ ।
दमक ८ नम्बर वडा कार्यालयले वडा सदस्य ख्याम श्रेष्ठको संयोजकत्जमा बनाएको हस्पिटल विवाद समाधान समितिले तयार पारेको प्रतिवेदन वडा कार्यालयमा बुझाइसकेको बताइएको छ ।
कम्पनी नियम विपरित निजहरुले अन्य सञ्चालक तथा शेयर सदस्यहरुको उपस्थिती र बैठक बिनानै एक्लौटी रुपमा गएको भाद्र ६ गते आफना नाममा मात्रै शेयर कायम गरेको देखिएकाले किर्ते तथा जालसाँजी समेत गरेको आरोपितहरुको ठहर छ ।
गैरे दमकमानै ऊँ शान्ति डेन्टल सञ्चालन गर्दै आएका छन् भने भुसाल अन्यत्रै बस्ने गरेका छन् ।
गैरेले स्वास्थ्य निकायको उपल्लो तह सम्म आफनो पहुँच रहेको बताउँदै स्वास्थ्य क्षेत्रका चिकित्सक तथा अन्य स्वास्थ्यकर्मी र कतिपय राजनीतिक , सामाजिक अगुवाहरुलाई समेत स्वास्थ्य क्षेत्रमा लगानी गर्न भन्ने गरेको र लगानी गरिएको पैसा अपचलन गर्ने गरेको बताइएको छ ।
स्वास्थ्य बीमा कार्यक्रम समेत सञ्चालनमा रहेको सो हस्पिटलमा लगानीकर्ता चिकित्सकहरुले आफूले लगानीको हर हिसाब मागेर पारदर्शी कारोबार गर्न माग गर्दा उल्टै धम्क्याउने गरेको पीडितहरुको भनाई छ ।
उजुरी गर्नेहरुमा बराल, सञ्चालक सदस्य नारायण श्रेष्ठ र हेमराज पोखरेल हुन भने डा. सञ्जय रिमाल, डा. प्रकाश शर्मा, डा. दिव्या तुलाचन, डा. नविन ढकाल र सुजन खरेल सो हस्पिटलका लगानीकर्ता हुन् । लगानीकर्ताहरुको सो समूहलाई गैरेले हस्पिटलमा लगानी गर्न आग्रह गर्दै पटक पटक झण्डै डेढ करोड रुपैयाँ लिएर शेयर कायम नगरी ठगी गरेको जिल्ला प्रशासन कार्यालय झापामा दर्ता भएको उजुरीमा जनाइएको छ ।
कूल ७५ लाख लगानी रहेको सो अस्पतालमा गैरे २०७६ सालमा थप ७५ लाख रुपैयाँ लगानी गरेर आउन तयार भएपछि तत्कालिन शेयर होल्डरहरुले उनलाई स्वीकारेका थिए । सोही समयमा शेयर नामसारी भएपछि हस्पिटलमा गैरेले एक्लौटी गर्ने गरेको अन्य लगानीकर्ता तथा सञ्चालकहरुको दाबी छ ।
गैरेले दमकमा निर्णायक रिफरेन्स ल्याब प्रालिमा समेत डाक्टरहरुको समुहलाई कम्पनीको शेयर बनाएर मोटो रकम असुल गरेका र दमक हस्पिटललाई नोक्सानीमा लगेर एक्लौटी स्वामित्वमा रहेको ऊँ शान्ती डेन्टल मार्फत कमाउ धन्दा चलाइरहेका प्राप्त समाचार स्रोतहरुको दाबी छ ।
