दमक/ बिधिवत रुपमा यस बर्षको दशैं शुरु भएको सातौं दिन बितिसकेको छ । आज महाष्टमी । चौतर्फी रुपमा दशैंलाई स्वागत गर्ने र दशैं मनाउने तयारीमा सर्वसाधारण जुटिसकेका छन ।
झापामा दशैंँसँगै नेकपा एमालेका अध्यक्ष एवं पूर्व प्रधानमन्त्री केपी शर्मा ओली पार्टी नेता, कार्यकर्ता र सर्वसाधारणसँग दशैं लक्षित शुभकामना आदनप्रदान, व्यक्तिगत भेटघाट र कुराकानीमा व्यस्त छन ।
दशैंमा सधैंका बर्षहरु जस्तै अध्यक्ष ओलीले यस बर्षपनि एमाले कार्यकर्ताहरुसँगै अन्य राजनीतिक दलका नेता, कार्यकर्ताहरुलाई पनि विर्तामोडमा औपचारिक कार्यक्रम गरि शुभकामना दिए ।
नवरात्रको छैठौं दिन षष्ठीमा आयोजना गरिएको शुभकामना आदान–प्रदान तथा चियापानमा सहभागी हुन अध्यक्ष ओलीसँगै पार्टी उपाध्यक्ष बिष्णु पौडेल पनि आएका छन ।
शुभकामना आदनप्रदानको मेसो मिलाएर अध्यक्ष ओली र उपाध्यक्ष पौडेलको झापामा सक्रिय उपस्थितीलाई एमाले राजनीतिमा महत्व र चासोसाथ हेरिएको स्वयं एमाले नेता, कार्यकर्ताहरुले बताउने गरेका छन ।
एमाले झापाका एक जना सक्रिय कार्यकर्ताले भनेका छन– “अध्यक्ष ओली त आफनो घर परिवार झापामै भएकाले र आफनै निर्वाचन क्षेत्र पनि झापामै पर्ने भएकाले यहाँ आउनु जानु र समय बिताउनुलाई स्वभाविक मान्न सकिन्छ तर दशैंको बेला बुटबल घर भएका बिष्णु पौडेल ओली सँगसँगै झापाका गाउँ –गाउँ सम्म भेटघाट र औपचारिक कार्यक्रममा निरन्तर सक्रिय हुनुले खास अर्थ र महत्व पक्कै राखेको छ ।” अध्यक्ष ओली र पौडेल जिल्लाका विभिन्न देहाती क्षेत्रमा पनि सँगै पुगेका छन ।
आइतबार पार्टीले गौरादह ५ मा आयोजना गरेको शुभकामना आदनप्रदान कार्यक्रममा सहभागी भएका ओली र पौडेलसँगै नेता अग्नी खरेल, कोशी प्रदेशका पूर्व मुख्यमन्त्री एवं नेता हिक्मत कार्की लगायतका नेताहरु पनि सँगै थिए । ओली नेतृत्वको सो टोलीले गौरादह २ मा रहेको लाहा फैक्ट्री , गौरादह ७ को आदिवासी संग्राहालय निर्माणस्थल, गौरादह ८ को ड्रायगन फ्रुट र बयर खेती र गौरादह ९ बैगुन्धुरामा रहेको लाहाको खेती अवलोकन गरेका छन । त्यस्तै अध्यक्ष ओलीले हुलाकी राजमार्ग अन्तर्गत गौरीगञ्ज १ चौरीमा पर्ने कन्काई पूलको निर्माणाधिन अवस्था र दमकस्थित ग्रीन नेपाल नामक एक घरेलु उद्योगको पनि अवलोकन गरेका छन । एमाले झापा क्षेत्र नं ५ का संयोजक तुलसी कार्कीका अनुसार अध्यक्ष ओलीले आफनो निर्वाचन क्षेत्र विशेष अनुगमन तथा अवलोकन भ्रमण गरेका हुन ।
झापा बसाईका क्रममा अध्यक्ष ओलीको स्वागत सत्कारको रौनक र चर्चा सर्वसाधारण र कार्यकर्ताहरुमाझ यसपटक अघिल्ला पटकहरुमा भन्दा कम भएको देखिन्छ । यद्यपी अध्यक्ष ओलीले यसपटकको दशैंमा झापा आएर बालबालिकासँग दशैं स्मरण गर्दै रमाएका दृश्य र चङगा उडाएको दृश्य कैद भएको फोटो, भिडियो र ओलीसँग महिला बालबालिकाहरुले लिएको सेल्फीको चर्चा भने निक्कै छ । ओलीले बालबालिकासँग चङगा उडाउँदै हेप्पी दशैं भनेका छन ।
