कांग्रेस गौरादह नगर सभापतिका उम्मेदवार प्रकाश कार्कीलाई तीन प्रश्न

-मेरो राजनीतिक यात्रा विद्यार्थी जीवनदेखि नै सुरु भएको हो । वि.सं. २०४४ सालमा कक्षा ९ मा पढ्दै गर्दा नेपाल विद्यार्थी संघसँग जोडिएँ । त्यसपछि २०४८ सालमा नेपाली कांग्रेसको क्रियाशील सदस्य बनेँ । मेरो कांग्रेससँगको सम्बन्ध राजनीतिक मात्र होइन, पारिवारिक पनि हो । घरमै कांग्रेसका नेता-कार्यकर्ताको आउजाउ हुन्थ्यो ।

लोकतन्त्र, प्रजातान्त्रिक समाजवाद र बीपी कोइरालाको विचारबारे छलफल हुने वातावरण थियो । त्यसैले आफूलाई जन्मजात कांग्रेसीका रूपमा चिनाउँदै आएको छु ।

पार्टीमा लामो समय काम गर्दा संगठन र कार्यकर्तासँग नजिक भएर काम गर्ने अवसर पाएको छु ।

मेरो राजनीतिक यात्रा पद प्राप्तिका लागि मात्र होइन, कांग्रेसको विचार र संगठनलाई स्थानीय तहमा बलियो बनाउने उद्देश्यले अघि बढेको हो । अबसम्मको अनुभवलाई संगठन सुदृढीकरणमा उपयोग गर्न चाहन्छु ।

-गौरादह कांग्रेसलाई अझ एकताबद्ध, सक्रिय र जनतासँग जोडिएको संगठन बनाउनु अहिलेको आवश्यकता हो । अग्रजको अनुभव र नयाँ पुस्ताको ऊर्जालाई जोडेर संगठनलाई अघि बढाउनुपर्छ । पुराना कार्यकर्ताको सम्मान गर्दै नयाँ पुस्तालाई कांग्रेसको संगठनमा जोड्नुपर्छ । अहिले लोकतन्त्र र गणतन्त्रका विषयमा चुनौतीहरू देखिएका छन् । यस्तो अवस्थामा कांग्रेसले आफ्नो विचार र संगठनलाई थप सुदृढ बनाउन आवश्यक छ ।

अब नेतृत्वले पहिले आफ्नो घर अर्थात् पार्टी संगठनलाई व्यवस्थित गर्नुपर्छ र त्यसपछि गाउँटोलसम्म पुगेर विचार र संगठन विस्तार गर्नुपर्छ ।

जेन्जी आन्दोलनले उठाएका मागलाई सम्बोधन गर्दै युवा तथा विद्यार्थीलाई राजनीतको मूलधारमा ल्याउनु पनि आवश्यक छ । भाषण र पैसा खर्च गरेर प्राप्त गरेको नेतृत्व दिगो हुँदैन । संगठन निर्माण, कार्यकर्तासँगको निरन्तर सम्बन्ध र जनतासँगको प्रत्यक्ष सम्पर्कबाट मात्रै पार्टी बलियो हुन्छ भन्ने मेरो मान्यता हो ।

– मैले गौरादहको भूगोल, यहाँको सामाजिक अवस्था र पार्टी संगठनलाई नजिकबाट बुझेको छु । विद्यार्थी राजनीतिदेखि कांग्रेसमा निरन्तर सक्रिय रहँदै आएको अनुभव छ । पार्टी राजनीतिसँगै सामाजिक र सहकारी क्षेत्रमा पनि काम गरेको छु । रेडक्रसको उपसभापति, गौरादह लायन्स क्लबको अध्यक्ष तथा लायन्सको जिल्ला तहको नेतृत्व सम्हालेको छु ।

शुभलक्ष्मी सहकारीको अध्यक्षका रूपमा दुई कार्यकाल काम गरेको अनुभव पनि छ । नेपाल ल क्याम्पसबाट बीएल अध्ययन गरेको छु ।

लामो राजनीतिक तथा सामाजिक अनुभवलाई अब पार्टी संगठन निर्माणमा उपयोग गर्न चाहन्छु । अग्रजहरूको आशीर्वाद, साथीहरूको सहयोग र जेन्जी पुस्ताको साथ लिएर गौरादह कांग्रेसलाई थप संगठित र जनतामाझ स्थापित गर्न सक्छु भन्ने विश्वासका साथ नगर सभापतिमा उम्मेदवारी दिने तयारी गरेको हुँ ।