दमक/ झापाका पुराना शिक्षक जय बहादुर श्रेष्ठ (जय सर) को परिचय अब साहित्यसँग पनि जोडिन पुगेको छ ।
झापा मोडल अंग्रेजी माविका संस्थापक निर्देशक समेत रहेका श्रेष्ठले शनिबारदेखि ” के दिऊँ तिमीलाई ” नामक कृति ल्याएका छन् ।
श्रेष्ठका गुरु प्राध्यापक डा. दयाराम श्रेष्ठ, अग्रज पत्रकार चन्द्र भण्डारी, लेखक तथा पुराना शैक्षिक व्यक्तित्व खेमलाल पोखरेल, कृतिकार श्रेष्ठकी धर्मपत्नी सलुजा श्रेष्ठ , छोरा सागर श्रेष्ठ लगायतले संयुक्त रुपमा लोकार्पण गरेका छन् ।
उनको कृतिमा कविता तथा गीतहरू समावेश छन् । कृतिका बिषयमा साहित्यकार शिव प्रणतले समीक्षा गरेका छन् ।
लेखक श्रेष्ठ ६२ बर्षिय श्रेष्ठले गौरादह बहुमुखी क्याम्पस, वाणी मावि लखनपुर र हिमालय मावि दमकमा समेत अध्यापन गराएर जय सरको परिचय बनाएका व्यक्तित्व हुन् । उनले एकताका झापाबाट कन्काई एक्सप्रेस नामक साप्ताहिक पत्रिकाको पनि प्रकाशन आरम्भ गरेर पत्रकारितामा पनि पहिचान बनाएका थिए । आफ्नै निजी लगानीमा उनले दमकमा झापा मोडल अंग्रेजी माविको शुरुवात गरेका हुन् । एनप्याव्सनको केन्द्रिय उपाध्यक्ष समेत रहेका लेखक श्रेष्ठ राजनीतिक रुपमा राष्टिय प्रजातन्त्र पार्टीको झापा जिल्ला अध्यक्ष पनि थिए । अहिले उनी आफैंले स्थापना गरेको झापा मोडलमा अभिभावकत्व लिएर शैक्षिक यात्रामा निरन्तर क्रियाशील छन् ।
