झापा/ झापा ५ यतिबेला चुनावी चर्चाको केन्द्र हो । सामाजिक सञ्जालमा यहाँका मतदाताहरुलाई भन्दा अन्यत्र बस्ने मतदाता हुन मतदाता हुन नसकेका उमेर समुहका प्रयोगकर्ता सबैको ध्यान यो क्षेत्रको चुनावमा खिचिएको छ ।
यो क्षेत्रमा हेभिवेट भनिएका दुई उम्मेदवार एमालेका केपी शर्मा ओली र रास्वपाका बालेन्द्र साह चुनाव लागेदेखि झापा– काठमाडौं ओहोरदोहोर गरिरहेका छन भने झापा ५ का असली स्थानीय उम्मेदवारहरु दिनहुँ आफ्ना पार्टीका आन्तरिक भेटघाट र क्षेत्र केन्द्रित चुनाव प्रचार सामग्रीसँगै आफ्नो उम्मेदवारीको खबर गाउँ टोल सम्म पुरयाउनमा केन्द्रित छन् । राष्ट्रियस्तरका मिडियामा कम चर्चा भएका तर मतदाताहरुमाझ राम्रो प्रभाव छोडेका उम्मेदवारहरुको दैनिकी बिल्कुल फरक छ ।
एमाले र रास्वपा बाहेकका यि उम्मेदवारहरु न त मान्छेको लावालस्कर लिएर हिंड्छन न गाडीको ताँतीनै हुन्छ ।
२०/२५ जना समर्थक, शुभेच्छुकहरुको समुहको साथमा उनीहरुको प्रचार असली स्थानीय मतदाताहरुसँग पुग्ने खालको देखिन्छ । सामाजिक सेवाका क्षेत्रमा जिवननै समर्पण गरेर राजनीतिक भन्दा बढी सामाजिक , अधिकारकर्मी महिला नेतृको पहिचान बनाएकी कांग्रेसकी उम्मेदवार दमक ९ की मन्धरा चिमरिया पौडेल बिहान देखिनै आफ्ना छरछिमेकी इष्टमित्रका घरमा पुग्छीन, कोही उनलाई भेटन घरमै आइपुग्छन् ।
हत्तपत्त बिहानको खाना बन्दोबस्ती गरेर निस्किन्छन् । महिला उम्मेदवार हुनुका नाताले मन्धरालाई साथ दिने आमा दिदीबहिनीहरुकै संख्या धेरै देखिन्छ ।
राष्टिय महिला अधिकार मञ्च, अनाथ बाल आश्रम जस्ता संघ संस्थामा नेतृत्व गरेर सामाजिक सेवा र महिलाको न्यायका क्षेत्रमा पहिचान बनाएकी मन्धराले मतदातासँगको भेटघाटमा राख्ने मुख्य एजेण्डा पनि महिला, बालबालिकाका न्याय र अधिकारका बिषयमा केन्द्रित हुने गर्छन । मतदातासँगको भेटमा उनले भन्ने गरेकी छिन– गाह्रो साह्रोमा सम्झिनु होला, भोट आउँदैछ म पनि उम्मेदवार छु । मन्धरा नेपाली कांग्रेसले देशभर प्रत्यक्ष तर्फ उठाएका ११ जना महिला मध्येकी एक सशक्त उम्मेदवार हुन् ।
उनको उम्मेदवारीको प्रसंगमा कांग्रेस उपसभापति विश्वप्रकाश शर्माले दमकमै आएका भनेका पनि छन – प्रत्यक्ष तर्फ कांग्रेसले देशभरका उम्मेदवार छान्दा मन्धरा दिदीलाई नै किन छान्यो ? भन्ने कसैलाई लाग्दै होला ? कसैले आश्चर्य पनि मान्दै होलान फागुन २१ मा यहाँका मतदाताले त्यसको जवाफ संसदमा यहाँबाट मन्धरा चिमरियालाई पठाएर दिनु होला ।
उम्मेदवार मन्धराले भन्ने गरेकी छिन– कोक्रो हल्लाउने महिलाका हातलेनै देश पनि हल्लाइरहेका छन , चलाइरहेका छन् ।
झापा ५का अर्का प्रत्यासी हुन् नेपाली कम्युनिष्ट पार्टीका पूर्व बिद्यार्थी नेता रञ्जीत तामाङ । कमल गाउँपालिकाको १ नम्बर वडाका बासिन्दा युवा नेता तामाङको पनि चुनावी प्रचार देख्दा सामान्य लागे पनि उस्तै प्रभावकारी ढंगको छ ।
भेट भएका मतदाता कोही नातेदार दाजु भाउजु छन त कोही स्कूल कलेज पढदाका सहपाठी त बिद्यार्थी राजनीतिका समकालिन । चुनाव प्रचारका क्रममा तामाङले साइनो अनुसारको सम्बोधन गर्दै ओलीलाई लक्षित गरि भन्ने गरेका छन् ….ल है अब भत्ता खाने उमेरकालाई हैन काम गर्ने उमेरको, संघर्षबाटै आएको मान्छे हुँ । उनले चुनावमा भदौ २३ र २४ का दुवै घटनाका कारक केपी र बालेन भएको तर्क राख्दै प्रतिशोध र प्रतिरोधको राजनीतिले देशलाई भलो नगर्ने भएकाले सहि निकास दिन आफ्नो उम्मेदवारी भएको बताउने गरेका छन् ।
निक्कै चासो साथ हेरिने गरिएको र राप्रपाको झापा ३ पछि राम्रो पकड भएको क्षेत्र मानिने झापा ५ मा राप्रपा उम्मेदवार लक्ष्मीप्रसाद संग्रौलाको पनि चुनाव प्रचार मन्द शैलीमा तिब्र रुपले अघि बढिरहेको छ । उनको नाम यो भुगोलमा परिचित नाम हो ।
राप्रपाको राजनीतिसँगै व्यवसाय र सामाजिक काममा उनको नाम पनि कम चलेको छैन । उनले पार्टीको एजेण्डा मुलुकमा राजसंस्था र हिन्दु राष्ट्र कायम गर्न आफ्नो उम्मेदवारी रहेको बताउँदै मतदाताका घर घरमा पुगिरहेका छन् । गौरीगञ्जमा पुगेर केही दिन अघि पार्टीको चुनाव प्रचार कार्यालय उदघाटनमा उनले भने–यो देश बहुसंख्या हिन्दु सनातनीहरु बसेको देश हो । धर्म निरपेक्षता खारेजी आफ्नो एजेण्डा भएको र यस क्षेत्रका नागरिकहरुको सेवानै आफ्नो मुल उद्धेश्य भएको बताए ।
यसपटकको निर्वाचनमा पहिलो पटक चुनाव लड्दै गरेको पार्टी श्रम संस्कृति पार्टीका युवा उम्मेदवार समिर तामाङको झन प्रचारको शैली श्रम गरेर अघि बढिरहेको छ । धरानका पूर्व मेयर हर्क साम्पाङको नेतृत्वमा खुलेको यो पार्टीले देश बनाउन श्रम संस्कृतिमा जोड दिदै आए जस्तै यस क्षेत्रमा उम्मेदवार तामाङ स्वयं मतदाताहरुसँग श्रममा खटिएर चुनाव प्रचार प्रसार गरिरहेका छन् । तामाङको चुनाव प्रचारका सिलसिलामा गाउँलेहरुले शनिबार कमल गाउँपालिकामा रहेको ढ्यांग्री खोला (कमल २ र ४ जोड्ने) मा उनकै सहभागितामा काठे पूल निर्माण गरेका छन् ।
