काठमाडौं/ काठमाडौंको भृकुटी मण्डपमा जारी नेपाली कांग्रेसको विशेष महाधिवेशनका लागि आइतबार साँझसम्म २ हजार १८५ जनाले नाम दर्ता गराएका छन् ।
विशेष महाधिवेशन सचिवालय सदस्य युवराज पाण्डेले साँझ ६ बजेर ५ मिनेटसम्म २ हजार १८५ जना महाधिवेशनले नाम दर्ता गराएको बताए । नाम दर्ता गराउने क्रम जारी छ ।
नीति र नेतृत्व दुवै बदलिने थापाको घोषणा
महामन्त्री गगन थापाले पार्टीको नीति र नेतृत्व बदलिने घोषणा गरेका छन् ।
आइतबार भृकुटीमण्डपमा कांग्रेस विशेष महाधिवेशनलाई सम्बोधन गर्दै महाधिवेशन प्रतिनिधिहरुले नै नीति र नेतृत्व बदल्न चाहेको बताए ।
उनले यस्तो अवस्थामा यो विषय कहाँ गएर टुंगिन्छ भन्ने आफूलाई पनि थाहा नभएको भन्दै कांग्रेस पार्टीका नेता कार्यकर्ता कसैको दास नभएको बताए ।
‘प्रतिनिधिहरुले नीति पनि बदल्ने नेता पनि बदल्ने भनेर माग्नु भएको छ । यो कहाँ गएर टुंगिन्छ । मलाई थाहा छैन’, उनले सम्बोधनका क्रममा भने ।
विभाजन होइन देशको नेतृत्व गर्छ – शर्मा
कांग्रेसका महामन्त्री विश्वप्रकाश शर्माले पार्टीलाई विभाजन नलगी देशको नेतृत्व गर्ने गरी अघि बढ्ने बताएका छन् ।
आइतबार भृकुटीमण्डपमा विशेष महाधिवेशनलाई सम्बोधन गर्दै उनले कांग्रेसलाई टुक्र्याउने प्रयास नभई सिङ्गो पार्टीको नेतृत्व गर्ने उद्देश्यसहित आफूहरू अघि बढिरहेको बताए ।
“हामी सिङ्गो कांग्रेसको नेतृत्व गर्ने गरी अघि बढ्छौँ । सिङ्गो देशलाई नेतृत्व गर्ने दिशामा काम गर्छाैँ,” शर्माले आइतबार विशेष महाधिवेशनलाई सम्बोधन गर्दै भने ।
उनले विशेष महाधिवेशन कुनै भीड प्रदर्शन नभई अनुशासित र जिम्मेवार राजनीतिक जमातको अभिव्यक्ति भएको बताए । बन्दसत्रबाट हुने निर्णयले कांग्रेसको आगामी राजनीतिक दिशा मात्र नभई देशकै भविष्य बदल्ने आधार तय गर्ने उनले बताए ।
