दमक/ नेपाली कांग्रेसका महामन्त्रीद्धय गगन थापा र विश्वप्रकाश शर्माको अगुवाईमा यही पुष २७ र २८ गते काठमाडौंमा आयोजना गरिएको नेपाली कांग्रेसको विशेष महाधिवेशनलाई प्रभाव पार्ने गरी संस्थापन समुहले सो पार्टीका तरुणहरुको भेला आयोजना गरेको छ ।
संस्थापन पक्षको असहमतिका बाबजुद महामन्त्रीद्धयको अगुवाइमा आयोजना गरिएको विशेष महाधिवेशनलाई लक्षित गर्दै तरुण दलका केन्द्रिय नेताहरुको भेला आयोजना गरिएको हो ।
नेपाल तरुण दलका केन्द्रिय अध्यक्ष विद्धान गुरुङले हस्ताक्षर गरेर शुक्रबार एक सूचना जारी गर्दै यही फागुन २१ मा हुने प्रतिनिधि सभा सदस्य निर्वाचन र बैशाख २८ देखि ३१ सम्म आयोजना हुने नेपाली कांग्रेसको १५ औं नियमित महाधिवेशनका सन्दर्भमा छलफल गर्न तरुण दलका केन्द्रिय नेताहरुको भेला बोलाएका हुन् ।
विशेष महाधिवेशन पक्षधरहरुले राखेको महाधिवेशनको उदघाटन कार्यक्रमकै दिन आकस्मिक रुपमा तरुण दलको केन्द्रीय नेतृत्वलाई पार्टी कार्यालयमा बोलाउनुले सो भेलाको उद्धेश्य विशेष महाधिवेशन प्रभावित पार्नु हो भन्ने सहजै अनुमान लगाउन सकिन्छ ।
यसैबीच झापाबाट ठुलो संख्यामा नेता, कार्यकर्ताहरु पार्टीको विशेष महाधिवेशनमा सहभागी हुने देखिएको छ ।
विशेष महाधिवेशन पक्षधर झापाली नेताहरु केही दिनदेखि निरन्तर महाधिवेशनको व्यवस्थापनका लागि काठमाडौंमा छन् ।
झापाको क्षेत्र नं ५ बाट निर्वाचित २४ मध्ये २१ महाधिवेशन प्रतिनिधिहरु विशेष महाधिवेशनमा भाग लिने तयारीमा लागेका हुन् । त्यसैगरी क्षेत्र नं १ र २ बाट पनि अधिकांश महाधिवेशन प्रतिनिधिहरु विशेष महाधिवेशनमा भाग लिन काठमाडौं पुगेका विशेष महाधिवेशन पक्षधर पार्टी महासमिति सदस्य समेत रहेका नेता मेदनी प्रसाद सिटौलाले बताए । ३ र ४ बाट पनि आंशिक रुपमा महाधिवेशन प्रतिनिधि साथीहरु आउँदै हुनुहुन्छ, देशैभर कांग्रेसमा परिवर्तन पक्षधर र यथास्थिती पक्षधरहरु छुट्टिने समय पनि हो यो यसले कांग्रेसमा सुधार र परिवर्तनका लागि मार्गप्रशस्त गर्ने वातावरणको सिर्जना भएको छ, हामी अलिकति पनि विचलित छैनौं– झापा ५ बाट निर्वाचित कांग्रेसका महासमिति सदस्य समेत रहेका युवा नेता अइन्द्रविक्रम केरुङले भने ।
कांग्रेस नेता एवं कोशी प्रदेश सहमहामन्त्री खड्ग फागो कोशी प्रदेशबाट दुई तिहाई प्रतिनिधिहरू विशेष महाधिवेशनमा सहभागी हुने दाबी गर्छन ।
फागोले पार्टी रूपान्तरणको पक्षमा रहेको भन्दै कोशी प्रदेशबाट विशेष महाधिवेशनमा दुई तिहाइ प्रतिनिधिहरू सहभागी हुने दाबी गरेका हुन् ।
कोशी प्रदेशमा कुल प्रतिनिधि संख्या ७ सयभन्दा बढी रहेको बताउँदै उनले तीमध्ये ठुलो हिस्सा विशेष महाधिवेशनको पक्षमा उभिएको बताए । ‘कोशीको बहुमत मात्र होइन, करिब दुई तिहाइ प्रतिनिधिहरू विशेष महाधिवेशनको पक्षमा छन्,’ फागोले दाबी गरे ।
विशेष महाधिवेशनबाट नयाँ नेतृत्व चयन हुने सम्भावनाबारे फागोले भनेका छन्– ‘विशेष महाधिवेशन भनिसकेपछि नयाँ नेतृत्व पनि आउन सक्छ, अन्य नेतृत्व र नीतिमा फेरबदल पनि हुन सक्छ । यो सबै पार्टीलाई जीवन्त बनाउनका लागि हो ।’
