दमक/ निजी तथा आवासीय विद्यालय अर्गनाइजेशन नेपाल (प्याब्सन) झापाले ३५ औँ स्थापना दिवसका अवसरमा शिक्षाक्षेत्रमा योगदान पुर्याएका विभिन्न व्यक्तित्वहरुलाई सम्मान गरेको छ । शिक्षासेवी, दीर्घकालीन रूपमा सेवा गरेका शिक्षक, शैक्षिक उपलब्धि हासिल गरेका विद्यार्थी तथा पत्रकारलाई सम्मान गरिएको हो ।
बिहिबार विर्तामोडमा प्रतिस्पर्धात्मक सांस्कृतिक कार्यक्रम, गायन तथा नृत्य प्रतियोगितासहित सम्मान कार्यक्रम गरिएको हो ।
सो अवसरमा संस्थापक प्रिन्सिपल सम्मानतर्फ योगदान र विशिष्टताको आधारमा विराटज्योति अंग्रेजी माध्यमिक विद्यालय, बिर्तामोडका गणेशप्रसाद ओली, देवकुल अंग्रेजी माध्यमिक विद्यालय, बिर्तामोडका धरणीरस मैनाली र प्रभुकुमार श्रेष्ठ तथा रूपरत्न अंग्रेजी माध्यमिक विद्यालय, अर्जुनधारालाई सम्मान गरिएको छ ।
त्यस्तै, मरणोपरान्त संस्थापक सम्मान अन्तर्गत टावर टेम्पल अंग्रेजी विद्यालय, बिर्तामोडका संस्थापक प्रिन्सिपल स्वर्गीय नरेशमान धिमाललाई सम्मान प्रदान गरिएको थियो ।
अविछिन्न कार्यरत शिक्षक सम्मानतर्फ हरिकुल नमूना माध्यमिक विद्यालय, कनकाईका शिक्षक मुक्ति दाहाल पुरस्कृत भएका छन भने उत्कृष्ट पालिका सम्मान प्याब्सन अर्जुनधारालाई प्रदान गरिएको छ ।
पत्रकारिता क्षेत्रबाट नेपाल पत्रकार महासंघ झापाका उपाध्यक्ष समेत रहेका पत्रकार सुब्रत न्यौपाने र रासस तथा पूर्वाञ्चल दैनिकमा आवद्ध पत्रकार सुरेन्द्र भण्डारी सम्मानित भएका छन् ।
यसैगरी, माध्यमिक शिक्षा परीक्षा (एसईई) २०८१ मा ४.०० जीपीए प्राप्त गर्ने विद्यार्थीहरूलाई नगदसहित प्रशंसा–पत्र प्रदान गरी सम्मान गरिएको थियो । सम्मानित विद्यार्थीहरूमा प्रज्ञा एकाडेमी, भद्रपुरकी मिनकुमारी दास, नेशनल मेरीगोल्ड स्कूल, भद्रपुरका प्रनिल सत्याल, बाल्मीकि एजुकेशन फाउण्डेशन, बिर्तामोडका हृदयप्रसाद शिवाकोटी र अंकित कटुवाल रहेका छन् ।
त्यस्तै माउन्ट एभरेष्ट विद्यालय, गौरादहका अर्पण रोय र जेनिस कोइराला, इमिनेन्ट कञ्चनजंघा स्कूल, गौरादहका कुशल लिम्बू, हेमन्त राजवंशी र मुना पाण्डे, नमूना अंग्रेजी विद्यालय, गौरादहकी सुमेधा कोइराला र अलिसा सापकोटा सम्मानित भए ।
पारिजात अंग्रेजी माध्यमिक विद्यालयकी नम्सा लिम्बू थलाङ, ज्ञानकुञ्ज एकाडेमीका सागर राउत तथा ज्ञानोदय आवासीय माध्यमिक विद्यालय, गौरीगञ्जकी सलिना कार्कीलाई पनि उत्कृष्ट शैक्षिक उपलब्धिका लागि सम्मान गरिएको थियो ।
कार्यक्रम प्याब्सनका वरिष्ठ सल्लाहकार टिकाराम पुरीको प्रमुख आतिथ्यमा भएको थियो ।
प्याब्सन झापाका सचिव लक्ष्मीप्रसाद उप्रेतीले सञ्चालन गरेको कार्यक्रममा जिल्लास्तरीय सामूहिक सांस्कृतिक नृत्य, एकल शास्त्रीय नृत्य, विभिन्न वर्गका गायन प्रतियोगिता समावेश गरिएको थियो ।
