कमल/ स्वास्थ्य सेवाको पहुँचबाट टाढा रहेका ग्रामीण तथा अर्ध–शहरी क्षेत्रका सर्वसाधारणलाई लक्षित गर्दै शुरु गरिने कोशी प्रदेश सरकारको महत्वाकाङ्क्षी कार्यक्रम ‘कोशी प्रदेश सरकारको घुम्ती अस्पताल’ झापाको कमलमा उदघाटन गरिने भएको छ ।
प्रदेशकै पहिलो मोबाइल घुम्ती अस्पताल स्वास्थ्य शिविर कमल नगर अस्पतालमा सञ्चालन हुने कमल गाउँपालिकाले जनाएको छ ।
पौष २५ गते शुक्रबार आयोजना हुन लागेको सो शिविरका माध्यमबाट नसर्ने रोगको स्क्रिनिङ, रक्तचाप जाँच, पिसाब परीक्षण, BMI मापन, मधुमेह (सुगर) जाँच , थाइराइड जाँच, मुटु सम्बन्धी परीक्षण, मुटुको भिडियो एक्स–रे, हड्डी तथा नसा सम्बन्धी रोगको जाँच तथा विशेषज्ञ परामर्श सेवाका साथै चिकित्सकहरुको सिफारिसमा आवश्यकता अनुसार औषधिको निःशुल्क वितरण समेत गरिने जनाइएको छ ।
सो सम्बन्धिको कार्यक्रमको पूर्व तयारी बारे आज कमल गाउँपालिकामा गाउँपालिका अध्यक्ष हुकुमसिंह राईको प्रमुख उपस्थितीमा स्वास्थ्य निकायका उच्च अधिकारीहरु तथा विज्ञहरुसँग छलफल भएको छ ।
छलफलमा कोशी प्रदेश स्वास्थ्य निर्देशनालयका निर्देशक ज्ञान बहादुर बस्तेन, जनस्वास्थ्य प्रशासक (नवौँ) रमेश बराकोटी, अस्पताल नर्सिङ प्रशासक (नवौँ) आस्था थापा, जिल्ला स्वास्थ्य कार्यालय, झापाका जनस्वास्थ्य निरीक्षक विश्वनाथ श्रेष्ठ, जनस्वास्थ्य अधिकृत अनिल श्रेष्ठ, प्रमुख प्रशासकीय अधिकृत केशव कुमार ढकाल लगायत सहभागी थिए ।
यस कार्यक्रमलाई स्वास्थ्य सेवामा पहुँच विस्तार, प्रारम्भिक रोग पहिचान र जनस्वास्थ्य सुदृढीकरणतर्फको ऐतिहासिक कदमका रूपमा हेरिएको छ । कोशी प्रदेशकै पहिलो कार्यक्रम कमल नगर अस्पतालबाट शुरु हुन लागेकोले कमल गाउँपालिकाका अतिरिक्त आसपास क्षेत्रका अधिकतम नागरिकहरु यसबाट लाभान्वित हुने अपेक्षा गरिएको गाउँपालिका अध्यक्ष राईले बताए । कोशी प्रदेश सरकारको घुम्ती अस्पताल स्वास्थ्य शिविरको उदघाटनमा कोशी प्रदेशका मुख्यमन्त्री हिक्मत कुमार कार्की तथा भौतिक पूर्वाधार तथा यातायात मन्त्री एवम् स्वास्थ्य मन्त्री भूपेन्द्र राई लगायतको उपस्थिती रहने जनाइएको छ ।
कोशी प्रदेश सरकारको घुम्ती अस्पताल कार्यक्रम लाई व्यवस्थित, प्रभावकारी र सफल रूपमा सञ्चालन गर्न आज कमल नगर अस्पतालमा योजना तथा समन्वय बैठक सम्पन्न भएको छ । बैठकमा सेवा प्रवाह प्रणाली, जनशक्ति परिचालन, उपकरण व्यवस्थापन तथा सेवाग्राही व्यवस्थापनसम्बन्धी विषयमा विस्तृत छलफल भएको कमल नगर अस्पतालका मेडिकल सुपरिटेन्डेन्ट डा. फुलक चन्द्र लावतीले जानकारी दिए ।
सोही दिन कमल नगर अस्पतालमा प्रविधिमा आधारित कृत्रिम बौद्धिकता सेवाको पनि स्वास्थ्य शिविर सञ्चालन हुने कमल–२ का वडा अध्यक्ष अशोक सुब्बाले जानकारी दिए । सेवाबाट क्षयरोग, फोक्सो तथा छातीसम्बन्धी रोगहरूको छिटो, प्रभावकारी र विश्वसनीय पहिचान गर्न सहयोग पुग्ने अपेक्षा गरिएको अस्पताल प्रमुख दिपक दाहालले जानकारी दिए ।
