दमक/ नेकपा एमालेको ११औँ महाधिवेशन नयाँ नेतृत्व चयन गर्दै बिहीबार सम्पन्न भएको छ । शनिबार भक्तपुरमा उदघाटन भएको महाधिवेशनको बन्द सत्र आइतबारदेखि काठमाडौँको भृकुटीमण्डपमा सञ्चालन भएको थियो ।
महाधिवेशनबाट एमाले अध्यक्षमा तेस्रो कार्यकालका लागि केपी शर्मा ओली निर्वाचित भएका छन् । उनले १ हजार ६६३ मत पाए भने प्रतिस्पर्धी ईश्वर पोखरेलले ५६४ मत पाएका छन् । एमाले एघारौँ महाधिवेशनबाट पदाधिकारीसहित ३०१ जना केन्द्रिय नेता निर्वाचित भएका छन् । जसमध्ये ओलीले निर्वाचन लड्दै आएको भुगोल झापा क्षेत्र नं ५ का मात्रै एक सचिवसहित एक दर्जन नेता छन् । त्यस्तै, उपाध्यक्षमा विष्णुप्रसाद पौडेल, रामबहादुर थापा ‘बादल’, पृथ्वी सुब्बा गुरुङ, गोकर्ण विष्ट र रघुजी पन्त निर्वाचित भएका छन्।
महासचिवमा शंकर पोखरेल पनि दोश्रो कार्यकालका लागि निर्वाचित भएका छन् । पोखरेलले १ हजार २२८ मत पाए भने प्रतिस्पर्धी सुरेन्द्र पाण्डेले ९९९ मत पाएका थिए ।
यसैगरी, उपमहासचिवमा लेखराज भट्ट, रघुवीर महासेठ र योगेश भट्टराई निर्वाचित भएका छन्। ।
यस्तै सचिवमा खगराज अधिकारी, छविलाल विश्वकर्मा, पद्मा अर्याल, भानुभक्त ढकाल, महेश बस्नेत, राजन भट्टराई, शेरधन राई र हिक्मतकुमार कार्की निर्वाचित भएका छन्।् । सचिवमा निर्वाचित कार्की ओलीको निर्वाचन क्षेत्र अन्तर्गतका हुन् । उनी कोशी प्रदेश सरकारका मुख्यमन्त्री समेत छन् ।
यससँगै एमालेको महाधिवेशनले केन्द्रीय अनुशासन आयोग र केन्द्रीय लेखा आयोगका पदाधिकारी र सदस्य पनि निर्वाचित गरेको छ ।
केन्द्रिय समितिमा निर्वाचित केन्द्रीय सदस्यहरुमा देवेन्द्र दाहाल (दमक) , गीता अधिकारी ( दमक) , इन्द्र भण्डारी (दमक) दिपक कार्की, (गौरादह) गोविन्द थापा (दमक) होमबहादुर थापा (दमक) मेनुका काफ्ले, (कमल) रोमनाथ ओली (कमल) र जलबर्षा राजवंशी (गौरादह) रहेका छन् । ओलीको गृह जिल्लाका र ओली निकट रहेका तर यसपटक इश्वर पोखरेलको कित्तामा पुगेका सचिव पदका उम्मेदवार नेता अग्नी खरेल झिनो मतान्तरले पराजित हुन पुगेका छन् ।
