दमक/ नेकपा एमालेको ११ औँ महाधिवेशनमा मतदानका लागि प्रयोगमा ल्याइएको बिद्युतीय भोटिङ मेसिनको प्रयोगमा पाका नेतालाई समस्या देखिएको छ । एकजना व्यक्तिलाई मतदान गर्न करिब ३० देखि ३५ मिनेट लाग्ने बताइए पनि करिब एक घण्टा लागेको छ ।
नयाँ प्रविधिमा अपडेट नभएका प्रतिनिधिलाई मतदानमा समस्या भएको निर्वाचन आयोगका एक सदस्यले जानकारी दिए । ‘लेख पढ नभएका र पाका नेताहरूलाई समस्या भएको देखिन्छ । कसैले त एक घण्टामा पनि मतदान गरि सक्नुहुन्न।
त्यस्तालाई सहजीकरण गर्ने व्यवस्था पर्याप्त छैन’, निर्वाचन आयोगका एक सदस्यले भने, ‘मतपत्र बदर हुने सम्भावना छैन तर मतपत्रमा छाप लगाउने बानी परेकाहरूलाई भने समस्या देखिन्छ ।’ एमालेको ११ औं महाधिवेशनमा अध्यक्ष पदका लागि केपी शर्मा ओली र ईश्वर पोखरेल बीच प्रतिस्पर्धा भइरहेको छ ।
केन्द्रीय निर्वाचन आयोगका सदस्य सानुराजा पोखरेलका अनुसार अध्यक्षका प्रतिस्पर्धी केपी ओली र ईश्वर पोखरेललाई मतदान गर्न ५५ मिनेट लागेको छ ।
महाधिवेशनमा कूल दुई हजार २६३ जना प्रतिनिधिले मतदान गर्नेछन् । मतदान प्रक्रिया सुरु भएपछि अध्यक्ष उम्मेदवार ओली र पोखरेलले पहिलो मतदान गरेका हुन् ।
