दमक/ डाइनामिक पब्लिक लाइब्रेरी (डिपिएल) नेपालको छैठौं राष्ट्रिय महाधिवेशन झापाको दमकमा उदघाटन गरिएको छ । पर्यटन व्यवसायी तथा लेखक कर्ण शाक्यको प्रमुख आतिथ्यमा शनिबार दमकमा महाधिवेशन उदघाटन गरिएको हो ।
डिपीएल नेपालकी राष्टिय अध्यक्ष अनिता खत्रीको अध्यक्षतामा भएको कार्यक्रमबीच प्रमुख अतिथी शाक्य, साहित्यकार एवं नेपाल प्रज्ञा प्रतिष्ठानकी सदस्य सुमित्रा वाङदेल चेली, लाइब्रेरीका संस्थापक अध्यक्ष भेषराज न्यौपाने लगायतले संयुक्त रुपमा महाधिवेशनको उदघाटन गरे ।
उदघाटन कार्यक्रमका वक्ताहरुले डिपिएल नेपालले पठन संस्कृतिसँगै युवाहरुलाई रचनात्मक कार्यमा जोडन खेलेको भुमिका प्रशंसनिय भएको उल्लेख गरे । उदघाटन कार्यक्रममा दमक ७ का वडाध्यक्ष भिम पौडेल, इलाका प्रहरी कार्यालय दमकका डिएसपी किशोर लम्साल लगायतको आतिथ्य रहेको थियो ।
महाधिवेशनमा संस्थाको बार्षिक प्रतिवेदन, आर्थिक प्रतिवेदन लगायत भावी योजना तथा कार्यक्रमहरुबारे पनि चर्चा परिचर्चा भएको बताइएको छ । महाधिवेशनमा संस्थाका २१ व्टा शाखाहरुबाट प्रतिनिधि तथा पर्यवेक्षकहरु समेत करीब २ सय जना सहभागी रहेका आयोजकले जनाएको छ । महाधिवेशनले दुर्गा प्रसाद खतिवडा ( दिवस)को अध्यक्षतामा ९ सदस्यीय कार्यसमिति निर्विरोध निर्वाचित गर्ने तयारी छ ।
निर्वाचन कार्यक्रम यसअघिनै शुरु भएको र सबै पदहरुमा आवश्यक संख्या भन्दा धेरै उम्मेदवार नभएकाले खतिवडाको अध्यक्षतामा सिंगो कार्यसमिति निर्विरोध निर्वाचित हुने निश्चीत देखिएको हो ।
