दमक/ इसाइ धर्मावलम्बीहरुको साझा संस्था दमक नगर इसाइ समाजले ख्रीष्टमस उत्सव २०८२ विशेष महत्वसाथ समुदाय केन्द्रित कार्यक्रमहरु गर्दै मनाउने भएको छ ।
समाजमा आवद्ध चर्च तथा मण्डलीहरुको सक्रिय सहभागीतामा इसाई धर्मावलम्बीका अतिरिक्त आम नागरिकहरुलाई लक्षित गर्दै सेवामुलक , आपसी सदभाव र एकता बलियो बनाउने किसिमका कार्यक्रमहरु गरिने आयोजक समितिले पत्रकार सम्मेलन मार्फत जानकारी दिएको छ ।
दमक नगर इसाइ समाजले आज बिहान आयोजना गरेको पत्रकार सम्मेलनमा जनाइए अनुसार दमक नगर इसाइ समाज स्थापनाको २९ औं बर्ष पुगेको छ । समाजका अध्यक्ष हेमन्त सुब्बाले समुदायप्रति प्रेम, सेवा र सदभाव अभिव्यक्त गर्ने उद्धेश्यले ख्रीष्टमस उत्सव २०८२ को आयोजना गरिएको बताए ।
कार्यक्रम सम्पन्न गर्न दमक नगर इसाइ समाजका पूर्व अध्यक्ष समेत रहेका पास्टर आकाश थुलुङ राईलाई कार्यक्रम संयोजकको जिम्मेवारी प्रदान गरिएको छ भने समाजमा आवद्ध चर्च तथा मण्डलीका अन्य पास्टरहरुलाई विभिन्न विभागीय जिम्मेवारीहरु तोकिएको छ । आयोजक समितिका अनुसार बडादिन ख्रीष्टमस शुभकामना आदनप्रदान कार्यक्रम पुष २ गते गोरखा डिपार्टमेन्टको प्राङगाण्मा सञ्चालन गरिनेछ ।
सो अवसरमा गीत, संगीत, नृत्य, ख्रीष्टमस सन्देशसहित लोकगायक सिताराम ताजपुरीयालाई सम्मान , परम्परागत नेपाली भेषभुषाको प्रदर्शनसँगै मानव शान्तीका लागि सामुहिक प्रार्थना गरिने कार्यक्रम संयोजक समेत रहेका दमक नगर इसाइ समाजका पूर्व अध्यक्ष आकाश थुलुङले जानकारी दिए ।
त्यस्तै पुष ४ गते दमक ५ स्थित नारायण गोपाल टोलमा निशुल्क दन्त शिविर सञ्चालन गरिनेछ । शिविरमा दन्त परीक्षण, परामर्श, आधारभूत उपचार, दन्त सफाई र दन्त स्वास्थ्य सेवा सम्बन्धि सचेतना कार्यक्रम सञ्चालन गरिनेछ । त्यसैगरी पुष २७ गते अघिल्ला बर्षहरु जस्तै कोशी प्रदेशस्तरीय अन्तर इसाइ समाज फुटसल प्रतियोगिता सञ्चालन गरिने आयोजकले जनाएको छ । प्रतियोगिताको विजेताले नगद ३५ हजार र उपविजेताले १५ हजार रुपैयाँ राशीको पुरस्कार जित्नेछन् । सो प्रतियोगितामा प्रदेशका १४ वटा टीमले भाग लिने संयोजक थुलुङले जानकारी दिए ।
पत्रकार सम्मेलनमा दमक नगर इसाइ समाजका सल्लाहकार राजकुमार राईसहित विशिष्ट व्यक्तित्वहरु सहभागी थिए । पत्रकार सम्मेलनको सञ्चालन समाजका सचिव पास्टर अजय पाठकले गरेका थिए ।
