दमक/ जेनजी आन्दोलनका क्रममा क्षतिग्रस्त बनेको दमकस्थित इलाका प्रहरी कार्यालय दमकको समिक्षालय भवन पुननिर्माण गरी सञ्चालनमा ल्याइएको छ ।
दमकका शैक्षिक परामर्श व्यवसायीहरुको करीब ६ लाख रुपैयाँको लागत सहयोगमा सो भवनको पुननिर्माण सम्भव भएको हो ।
दमकमा दमक उद्योग वाणिज्य संघको सक्रियतामा यस क्षेत्रका व्यवसायी तथा सहयोगी दाताहरुले इलाका प्रहरी कार्यालय दमकको पुननिर्माणका लागि अभियाननै सञ्चालन गरिएको छ । सो अभियान अन्तर्गत शैक्षिक परामर्श व्यवसायीहरुले स्वैच्छिक रुपमा यस क्षेत्रको शान्ति सुरक्षा पहिलो प्राथमिकतामा रहेको बिषय भन्दै प्रहरी कार्यालय हाता भित्रको समिक्षालय भवन निर्माणमा सहयोग जुटाएका थिए ।
शैक्षिक परामर्श व्यवसायीका नेता चिरन न्यौपानेका अनुसार शनिबार सो भवन इलाका प्रहरी कार्यालय दमकका डिएसपी किशोर लम्साललाई हस्तान्तरण गरिएको छ । सो अवसरमा नेपाल उद्योग वाणिज्य महासंघका केन्द्रीय सदस्य गोकूल श्रेष्ठ, संघका अध्यक्ष तथा पुननिर्माण समितिका कोषाध्यक्ष समेत रहेका दमक उद्योग वाणिज्य संघका अध्यक्ष गोपाल गुरागाइँ, पूर्व अध्यक्ष प्रकाश प्रसाइँ, शैक्षिक परामर्श व्यवसायीहरु लगायत सहभागी थिए ।
