दमक/ यही मंसिर अन्तीम साता काठमाडौंमा हुने नेकपा एमालेको ११ औं राष्ट्रिय महाधिवेशनका लागि प्रतिनिधिहरु छनोट गर्ने आन्तरिक चटारोले पार्टी अध्यक्ष केपी शर्मा ओलीको निर्वाचन क्षेत्र झापा ५ लाई पनि तताएको छ ।
संघीय निर्वाचन क्षेत्रस्तरमा हुने महाधिवेशन प्रतिनिधि चयनको निर्वाचनले पार्टी कार्यकर्ताहरुलाई चलायमान र उत्साहित बनाएको प्रतिक्रिया नेता, कार्यकर्ताहरुले दिएका छन् ।
पार्टीको केन्द्रिय नेतृत्व चयन गर्ने तथा चुनिने अधिकार समेत रहेका महाधिवेशन प्रतिनिधिहरुको चयन पार्टीका संगठित सदस्यहरुले गर्ने भएका कारण महाधिवेशन प्रतिनिधिका आकांक्षी अर्थात दाबेदार नेताहरु कार्यकर्ताहरुमाझ पुग्ने र आफ्नो दाबी पेश गर्दै मत माग्ने काममा भित्र भित्रै व्यस्त रहेका बताइएको छ ।
पार्टीको क्षेत्रीय कमिटीले नै महाधिवेशन प्रतिनिधि छनोटको निर्वाचन सम्पन्न गर्ने सर्कुलर बमोजिम क्षेत्र नं ५ मा अधिवक्ता नारायण भट्टराईलाई निर्वाचन संयोजकको जिम्मेवारी सुम्पिइएको छ ।
भट्टराई नेतृत्वको निर्वाचन समितिले आज निर्वाचन कार्यतालिका सार्वजनिक गरेको छ । सार्वजनिक गरिएको तालिका अनुसार मंसिर १० गते अर्थात मंगलबार बिहान १० बजे मतदाता नामावली प्रकाशन हुनेछ । मतदाता नामावलीमाथी दाबी विरोध ११.३० देखि १ बजे सम्म गर्न सकिने जनाइएको छ ।
मतदानका लागि पालिकास्तरमा मतदान केन्द्र (बुथ) तोकिए पनि निर्वाचन सम्बन्धिका अन्य सबै कार्यक्रमहरु भने दमक ९ स्थित पार्टी कार्यालयमा हुने पनि निर्वाचन समितिद्धारा जारी सूचनामा जनाइएको छ । झापा क्षेत्र नं ५ अन्तर्गत दमक र गौरादह नगरपालिका , कमल र गौरीगञ्ज गाउँपालिका पर्छन ।
सार्वजनिक गरिएको निर्वाचन तालिका अनुसार महाधिवेशन प्रतिनिधिका उम्मेदवारहरुको मनोनयन दर्ता ११ गते बिहान ११ बजेदेखि २ बजे सम्म हुनेछ भने प्रतिनिधि मनोनयन दर्तामा दाबी बिरोध सोही दिन ४ बजे सम्म गर्न सकिने जनाइएको छ । १२ गते २ बजे सम्म मनोनयन फिर्ताको समय तोकिएको छ भने उम्मेदवारको अन्तीम नामावली प्रकाशन १२ गते मध्यान्ह १२ बजे गरिने र मतदात १३ गते बिहान ८ बजेदेखि दिउँसो २ बजे सम्म सञ्चालन गरि सोको एक घण्टा पछिनै मतगणना गर्ने कार्यक्रम राखिएको छ ।
महाधिवेशन प्रतिनिधि जान चुनावको सामना गर्नुपर्ने
पार्टी अध्यक्ष केपी शर्मा ओलीको निर्वाचन क्षेत्रमा हुने महाधिवेशन प्रतिनिधि छनोटको निर्वाचनलाई निक्कै महत्वसाथ कार्यकर्ताहरु र एमाले इतरका राजनीतिक अगुवाहरु, समिक्षक र विश्लेषकहरुले हेरिरहेका छन् । यसअघिको महाधिवेशन प्रतिनिधि छनोट सर्वसम्मत रुपमा भएको यस क्षेत्रको अहिलेको परिस्थिती अलि भिन्न छ । पार्टीको महाधिवेशन प्रतिनिधि चयनका लागि पार्टीमा हालको केन्द्रीय समिति र सो भन्दा माथिल्लो तहका कतिपय जनवर्गीय संगठनका केन्द्रिय नेतृत्वहरुले चुनावको सामना गर्नुपर्ने छैन । जसका कारण पोलिटब्यूरो सदस्य एवं पूर्व मन्त्री देवेन्द्र दाहाल, वर्तमान मुख्यमन्त्री एवं स्थायी कमिटी सदस्य हिक्मत कुमार कार्की, केन्द्रिय सदस्यहरु रोमनाथ ओली, गीता अधिकारी,इन्द्र भण्डारी, दिपक कार्की र गोविन्द थापाले महाधिवेशन प्रतिनिधि चुनिन कार्यकर्ताहरुमाझ पुगिरहनु पर्दैन । यद्यपी महाधिवेशनमा उनीहरु मध्ये केही केन्द्रिय नेतृत्वको निर्वाचन समेत लड्ने भएका कारण प्रतिनिधिहरु छनोटको निर्वाचनमानै उनीहरुको सक्रियता रहने देखिन्छ ।
यस क्षेत्रबाट औपचारिक रुपमा महाधिवेशन प्रतिनिधिका दाबेदारहरु थुप्रै भएको बताइएको छ । पार्टीको प्रदेश , जिल्ला र क्षेत्र कमिटीमा रहेर जिम्मेवारी निर्वाह गरिरहेका नेताहरु र संसदीय फाँटमा समेत नेतृत्व गरिरहेका नेताहरु समेत महाधिवेशन प्रतिनिधि छनोटको निर्वाचनमा उम्मेदवारको रुपमा चुनावी मैदानमा उत्रिँदैछन् । पार्टी विधानले तोके अनुसार यस क्षेत्रबाट खुल्ला तर्फ ४ जना , महिला कोटामा तीन र ४० बर्ष भन्दा मुनिका युवाहरुको कोटामा एक जना गरी कूल ८ जना महाधिवेशन प्रतिनिधि चुनिनुपर्ने छ । पार्टी स्रोतका अनुसार महाधिवेशन प्रतिनिधिको उम्मेदवार बन्नका लागि खुल्ला तर्फ पार्टी सदस्य बनेको कम्तीमा १० बर्ष पूरा भएको हुनुपर्ने व्यवस्था छ भने महिला र युवा कोटाबाट महाधिवेशन प्रतिनिधिको उम्मेदवार बन्न कम्तीमा ७ बर्ष पुरानो पार्टी सदस्य हुनुपर्ने व्यवस्था रहेको छ ।
