दमक/ जेनजी आन्दोलनका क्रममा गत भाद्र २४ गते प्रहरीको साथबाट लुटिएका हतियारसहित तीन जना पक्राउ परेका छन् ।
दमक नगरपालिका–८ र इलामको चुलाचुली गाउँपालिका–४ बाट प्रहरीको लुटिएको दुई थान चाईनिज पेस्तोल र २० राउण्ड गोली सहित लुटपाटमा संलग्न ३ जनालाई पक्राउ गरिएको कोशी प्रदेश प्रहरी कार्यालय विराटनगरले जनाएको छ ।
पक्राउ पर्नेमा दमक–८ का २५ बर्षीय सरोज पुरी, दमक–६ का २९ बर्षीय बिश्व लिङ्देन र इलामको चुलाचुली–४ का पवन हाङ्सुरुम्वा रहेका छन ।
प्रहरीका अनुसार काठमाडौ महानगरीय प्रहरी कार्यालय तोडफोड, आगजानी गरी हात हतियार, गोलीगठ्ठा लुटेर फरार भएका सरोज पुरी आफ्नै घरमा लुकेर बसेको भन्ने बिशेष सुचनाको आधारमा सोमबार इलाका प्रहरी कार्यालय दमक र लागूऔषध नियन्त्रण व्यूरो काँकरभिट्टाबाट खटिएको प्रहरी टोलीले पुरीलाई एक थान पेस्तोल र १५ राउण्ड गोली सहित पक्राउ गरेको हो ।
पक्राउ परेका पुरीले लुटेर ल्याएको एक थान पेस्तोल र ५ राउण्ड गोली बिश्व लिङ्देनलाई दिएको र लिङ्देनले पेस्तोल र गोली चुलाचुली–४ का पवन हाङ्सुरुम्वालाई राख्न दिएको बताएपछि इलाका प्रहरी कार्यालय दमक, प्रहरी चौकी पेल्टीमारी र लागू औषध नियन्त्रण व्यूरो काँकरभिट्टाबाट खटिएको प्रहरी टोलीले हाङसुरुम्बालाई पक्राउ गरेको हो । सो क्रममा उनले बारीमा खाल्डो खनेर लुकाई राखेको एक थान पेस्तोल र ५ राउण्ड गोली समेत बरामद भएको हो । पक्राउ परेका उनीहरुमाथि आवश्यक कानूनी कारवाही तथा थप अनुसन्धान भईरहेको पनि प्रहरीले जनाएको छ ।
