दमक/ मेडिकल व्यवसायी दुर्गा प्रसाइँको नेतृत्वमा रहेको राष्ट्र, राष्ट्रियता, धर्म संस्कृति र नागरिक बचाउ अभियानले मसिंर ७ देखि आव्हान गरेको अनिश्चीतकालिन आम हड्ताललाई “असहज परिस्थिती” भन्दै झापाका अधिकांश निजी तथा संस्थागत बिद्यालयहरुले पठनपाठन बन्द रहने संकेत गरेका छन् ।
शिक्षण संस्थामा गरिने बन्दका कारण जिल्लामा मात्रै १० औं हजार हाराहारीमा बिद्यार्थीहरुको पठनपाठन प्रभावित हुने देखिएको हो ।
दमकको ग्लोबल एजुकेशन एकाडेमीले आफ्नो आधिकारिक फेसबुक पेज मार्फत सार्वजनिक सूचना गर्दै मसिंर ७ गते आइतबार असहज परिस्थितीका कारण पठनपाठन बन्द रहने जानकारी गराएको छ । त्यस्तै दमककै अर्को बोर्डिङ स्कूल सर्वोदय अंग्रेजी माविले विशेष कारणवश भोली बिद्यालय बन्द रहने सूचना गरेको छ ।
बिद्यालय क्षेत्रलाई शान्ती क्षेत्र घोषणा गरेर तत्कालिन माओवादी सशस्त्र द्धन्द्ध व्यवस्थापनका क्रममा भएको विस्तृत शान्ती सम्झौतामा समेत बालबालिका पढ्ने बिद्यालयहरुलाई बन्दमुक्त गरिने प्रतिबद्धता थियो ।
पछिल्लो समय गत भाद्र २३ र २४ मा तत्कालिन प्रधानमन्त्री केपी शर्मा ओली नेतृत्वको सरकार विरुद्ध छेडिएको जेनजी आन्दोलनका क्रममा क्याम्पस तथा बिद्यालयहरुबाट समेत बिद्यार्थीहरु सहभागी भएका थिए । आन्दोलनमा सरकारी कार्यालय , जनप्रतिनिधि र राजनीतिक नेतृत्वहरु निशानामा परेका थिए ।
यसपटकको प्रसाइँ नेतृत्वको समुहले भने प्याव्सनका नाममा पत्र पठाउँदै शिक्षण संस्था तथा अन्य सरकारी कार्यालयहरु समेत बन्द गर्न चेतावनी दिएसँगै सर्वसाधारण संशकित बनेका छन् । बालबालिकाहरुको सुरक्षाका दृष्टिकोणले समेत बन्द हड्तालको घोषणा गरिएको समयमा शिक्षण संस्था बन्द गर्नुपर्ने बाध्यात्मक अवस्था आएको शैक्षिक क्षेत्रका अगुवाहरुले प्रतिक्रिया दिएका छन् ।
