काठमाडौं/ नेकपा एमालेले ‘घर फर्क अभियान’अन्तरगत पार्टीमा आएका नेताहरूलाई महाधिवेशन प्रतिनिधि बनाउने निर्णय गरेको छ ।
बिहीबार बसेको सचिवालय बैठकले विगतमा एमाले छाडेका तर पछिल्लो समय पार्टीमा फर्किएका नेताहरूलाई प्रतिनिधि बनाउने निर्णय गरेको हो ।
एमाले उपमहासचिव प्रदीप ज्ञवालीले एमालेमा फर्किनुभन्दा पहिले तत अवस्थामा केन्द्रीय समितिमा रहेकाहरूलाई प्रतिनिधि बनाउने जानकारी दिनु भयो । नेकपा एसबाट रामकुमारी झाँक्री, किसान श्रेष्ठ लगायतका नेताहरू एमालेमा फर्किएका थिए ।
नेकपा एमालेले महाधिवेशनका लागि विभिन्न उपसमिति गठन गरेको छ । पार्टीको सचिवालय बैठकले ११औँ महाधिवेशनका लागि प्रतिनिधि व्यवस्थापन समितिमा काशीनाथ अधिकारीलाई संयोजक तोकेको छ ।
जनपरिचालनका लागि प्रदीप ज्ञवाली, आवास व्यवस्थापनका लागि छविलाल विश्वकर्मा, खाद्य व्यवस्थापनमा लेखाराज भट्ट, यातायात व्यवस्थापनमा गोकर्ण विष्ट अतिथि सत्कार समितिमा रघुवीर महासेठ, स्वयंसेवक परिचालनमा भानुभक्त ढकाल, प्रचार समितिमा पद्मा अर्याल संयोजक मञ्च व्यवस्थापनमा विनोद श्रेष्ठ, स्वास्थ्य समितिमा कृष्ण गोपाल श्रेष्ठ र आर्थिक समितिमा विष्णु रिमालको संयोजकत्वमा उपसमिति गठन गरिएको छ ।
