दमक/ झापाको बिर्तामोडस्थित पश्चिम बस स्ट्यान्ड नजिकै घर भाडामा लिएर तास जुवा खेलिरहेको अवस्थामा नौ जनालाई प्रहरीले पक्राउ गरेको छ ।
गोप्य सूचनाका आधारमा इलाका प्रहरी कार्यालय अनारमनीबाट खटिएको प्रहरी टोलीले शुक्रबार राति करिब १२ः४५ बजे सो डेरामा छापा मारी तास जुवा खेलिरहेका बिर्तामोड–२ का ३८ वर्षीय रतन राजवंशी, बिर्तामोड–३ का ४० वर्षीय डम्बर बस्नेत, बिर्तामोड–५ का ३६ वर्षीय राजेन्द्र चौधरी, बाह्रदशी गाउँपालिका–४ का २९ वर्षीय राजु कुमार साह, त्यही स्थानका किशोर पराजुली (२६), उत्तम शिवाकोटी (४३), राजन थापा (४३), दिवाकर प्रासाई (४०) र मेचीनगर–२ का २८ वर्षीय नारायण पराजुलीलाई पक्राउ गरिएको जिल्ला प्रहरी कार्यालय झापाले जनाएको छ ।
उनीहरूको साथबाट नगद रु ७५,६०० र नखोलेको ७ बुङ तास तथा खोलेको १ बुङ तास बरामद गरिएको प्रहरीले जनाएको छ ।
पक्राउ परेकाहरूमाथि मुलुकी अपराध संहिता २०७४ अनुसार जुवा कसुरमा अनुसन्धान अघि बढाइएको छ । जिल्ला प्रशासन कार्यालय झापाबाट पाँच दिनको म्याद लिई अनुसन्धान भइरहेको प्रहरीले जनाएको छ ।
