दमक/ झापा र सुनसरीका बिभिन्न स्थानबाट प्रतिबन्धित लागू औषधसहित ७ जनालाई प्रहरीले पक्राउ गरेको छ ।
इलाका प्रहरी कार्यालय दमकबाट गोप्य सूचनाको आधारमा खटिएको प्रहरी टोलीले कमल गाउँपालिका–५ का बिष्णु राजबंशीलाई आफ्नै घरमा लागूऔषधको बिक्री बितरण गरिरहेको अवस्थामा ट्रामाडोल–८ सय क्याप्सुल, स्पास्पेन ३ सय ट्याब्लेट र डाईक्लोमाईन ५ सय ट्याब्लेट सहित सो कार्यमा संलग्न सोही ठाउँका मौसम तामाङ, सावन जगेबु, रुस्तम बर्देवा र रुचल मगरलाई नियन्त्रणमा लिएको हो ।
पछिल्लो समय पाडाजुँगी–गौरीगञ्ज सडक अन्तर्गत कमल ५ र ६ मा पर्ने खण्डमा सडकबीचमा रोपिएका विरुवाहरु काट्ने, तोडफोड गरी क्षती पुरयाउने जस्ता क्रियाकलाप बढेपछि स्थानीयहरुले सो ठाउँमा लागूऔषध प्रयोगकर्ता र सेवनकर्ताहरुको बिगबिगी बढेको निष्कर्षसहित सुक्ष्म निगरानी र अनुसन्धान गरेका थिए । सोही आधारमा सो क्षेत्रमा लागूऔषधसहित मानिसहरु पक्राउ परेका बताइएको छ ।
यसैगरी जिल्ला प्रहरी कार्यालय सुनसरीले संखुवासभाको धर्मदेव नगरपालिका–४ का ओमनाथ घिमरेलाई ब्राउन सुगर २ ग्राम ३ सय ६० मिलिग्राम सहित र इलाका प्रहरी कार्यालय धरानले बिभिन्न किसिमका लागूऔषध ३ सय १७ ट्याव्लेट सहित धरान उप–महानगरपालिका–५ का रेहान लिम्बुलाई नियन्त्रणमा लिएको छ ।
पक्राउ परेकाहरु सबैमाथि थप कानुनी कारवाही अघि बढाइएको कोशी प्रदेश प्रहरी कार्यालय विराटनगरले जनाएको छ ।
