दमक/ दमक ८ स्थित पशुपति कीर्तन मण्डलीको ९ औं बार्षिक साधारण सभा सम्पन्न भएको छ । साधारण सभामा ज्येष्ठ अभिभावक र ज्येष्ठ सदस्य सम्मान कार्यक्रम गरिनुको साथै बिद्यार्थीहरुलाई नगद पुरस्कार समेत प्रदान गरिएको छ ।
जयनारायण सुवेदी, भगिरथ पोखरेल, रामप्रसाद सिटौला र टेकबहादुर खड्कालाई ज्येष्ठ अभिभावक सम्मान गरिएको हो । त्यस्तै ज्येष्ठ सदस्यहरु तर्फ हरीप्रसाद खतिवडा, कृष्णप्रसाद भण्डारी, केशव कार्की र कृष्णबहादुर कँडरियालाई सम्मान गरिएको छ ।
सो कीर्तन मण्डलीको संयोजकत्वमा रहेको लोकनाथ केशकुमारी दाहाल सेवा कोषमा रहेको ब्याजबाट पृथ्वी माविमा कक्षा १० मा अध्ययनरत जेहेन्दार छात्रा लक्ष्मी राई र दिक्षा परियारलाई जनही ७ हजार ५ सय ५ रुपैयाँ पुरस्कार र प्रशंसा पत्र प्रदान गरिएको छ । त्यस्तै जनता आधारभूत बिद्यालयमा अध्ययनरत मोहित साह, प्रतिज्ञा न्यौपाने, पशुपति माविकी राधिका उपाध्याय र प्रज्वल तामाङलाई पनि पुरस्कृत गरिएको छ ।
कीर्तन मण्डलीकी अध्यक्ष डोयना दाहालको अध्यक्षता र दमक नगर प्रमुख रामकुमार थापाको प्रमुख आतिथ्यमा भएको सो कार्यक्रममा दमक ८ का वडाध्यक्ष धर्मप्रसाद दाहालको विशिष्ट आतिथ्यता रहेको थियो । कार्यक्रमका प्रमुख अतिथी विशेष अतिथीसहित कोषका अध्यक्ष विश्वनाथ दाहाल र आयोजक कीर्तन मण्डलीका पदाधिकारीहरुले सो सम्मान तथा छात्रवृत्ति पुरस्कार आदी हस्तान्तरण गरेका थिए । संस्थाका लेखा समिति संयोजक लिलानाथ आचार्यले लेखा प्रतिवेदन प्रस्तुत गर्नुभएको थियो भने कार्यक्रमको सञ्चालन कीर्तन मण्डलीकी सचिव सीता पाठक (दुलाल)ले गर्नुभएको थियो । त्यस्तै कार्यक्रममा उपाध्यक्ष होमा खनालले स्वागत मन्तव्य राख्नु भएको थियो ।
