दमक/ भाद्र २३ र २४ गते भ्रष्टाचार अन्त्य र शासकीय सुधारमा व्यापक जनदबाबका लागि भएको व्यापक जनप्रदर्शन र त्यसपछि उत्पन्न परिस्थितीका कारण असामान्य बनेको जनजिवन आजदेखि क्रमशः सामान्य बन्दै गएको छ ।
परिस्थितीलाई नियन्त्रणमा लिन पछिल्लो चार दिनयता लगाइएको कर्फयू तथा निषेधाज्ञा समेत आजदेखि अर्को सूचना जारी नभए सम्मका लागि स्थगित गरिएको जिल्ला प्रशासन कार्यालय झापाले जनाएको छ ।
जिल्लास्थित सुरक्षा अंगका प्रमुखहरुसहित प्रमुख जिल्ला अधिकारी गोपाल प्रसाद अधिकारीको अध्यक्षतामा आज बसेको सुरक्षा बैठकले जेन–जीको आन्दोलन टुंगिएर सुरक्षास्थिती सहज बन्दै गएकाले तत्काल अर्को सूचना जारी नभईञ्जेल सम्मका लागि यसअघि लगाइँदै आएको कर्फयू हटाउने निर्णय गरिएको हो ।
बैठकले अझै पनि जिल्लाका कतिपयस्थानमा प्रहरी एकाईहरु नभएकाले सबै सुरक्षा एकाईहरुबीच एकापसमा प्रभावकारी समन्वय र सूचना आदनप्रदान गरी शान्ती सुव्यवस्था र अमनचयन कायम राख्ने पनि निर्णय गरेको छ । प्रहरी निकायको एकाई नभएको अवस्थामा रातको समयमा लुटपाट, आगजनी, हत्या तथा अन्य उच्छृखंल गतिबिधि हुन सक्ने सम्भावनालाई आजै अपरान्ह बस्ने सुरक्षा बैठकमा छलफल विश्लेषण गरि आवश्यक निर्णय लिइने पनि उल्लेख गरिएको छ ।
बिद्यालयहरु खुल्ने संकेत
यसैबीच पछिल्लो घट्नाक्रमका कारण बन्द रहेका झापाका बिद्यालयहरु आइतबारदेखि खुलाउन सकिने अवस्था बन्दै गएको छ । बालबालिका, तथा बिद्यालय सुरक्षाका दृष्टिकोणले र कर्फयू आदेशका कारण रोकिएको पठनपाठनलाई छिटो सूचारु गराउने बिषयमा शैक्षिक सरोकारवालाहरु संवाद र छलफलमा रहेका जनाइएको छ । कुनै अप्रिय घटना नभएको अवस्थामा निजी बिद्यालयहरु खुलाउने बिषयमा छलफल हुँदैछ ।
