दमक/ निर्माण थालिएको झण्डै एक दशक सम्म पनि झापाको साविक धरमपुर ९ – राना मिल –इन्द्रेणी चोक–कुञ्जीबारी सडक स्तरोन्नती (प्रिमियर प्रविधिको कालोपत्रे) योजना सम्बन्धित निकायको लापरवाहीको कारण अझै पुरा हुन सकेको छैन । १२ किलोमिटर लामो सो सडक निर्माणको जिम्मेवारी पाएको नागार्जुन–निलगिरी जेभी काठमाडौंले चरम लापरवाही गर्दा सो क्षेत्रका सडक उपभोक्ता (सर्वसाधारण) आक्रोशित बनेका छन् ।
उनीहरुले आज सो योजनाका बिषयमा नियामक निकाय पूर्वाधार बिकास कार्यालय भद्रपुर झापाले आयोजना गरेको सार्वजनिक सुनुवाईमा उपस्थित कोशी प्रदेश सरकारका भौतिक पूर्वाधार तथा विकास मन्त्री भुपेन्द्र राईसहित विभागीय प्रमुखसँग सम्बन्धित निर्माण कम्पनीलाई कालोसूचीमा राखेर तत्काल कारवाहीको दायरामा ल्याउन माग गरे ।
शिवसताक्षी २ साविक धरमपुरको मंगलबारे बजार नजिकै सडक किनारमा आयोजित सो सार्वजनिक सुनुवाईमा उपभोक्ताहरुले निर्माणको जिम्मेवारी पाएको कम्पनीका सञ्चालक युवराज डाँगीले स्थानीय जनप्रतिनिधि र नियामक निकायका प्राविधिक कर्मचारी तथा कार्यालय प्रमुखलाई समेत वेवास्ता गरेर चुनौती दिँदै काम अलपत्र छाडेकोप्रति मन्त्री राईको ध्यानाकार्षण गराउँदै निर्माण कम्पनीलाई बचाउ गर्ने वा माफी दिने काम नगरी दण्डीत गर्नुपर्ने सुझाव राखेका थिए ।
सुनुवाइमा सहभागी करिब १० जना सर्वसाधारणले सो योजना अधुरो राखेर त्यस भेगका नागरिकहरुलाई उपेक्षा गर्ने काम सम्बन्धित निकायहरुले गरेको भनि कडा आपत्ति समेत जनाए । उनीहरुले सडक निर्माणको जिम्मेवारी पाएको कम्पनीलाई कुनै पनि हालतमा पुनः काम गर्ने प्रतिबद्धता जनाएकै भरमा योजनाको म्याद थप गर्न नहुने र सो योजना कार्यान्वयनमा भएको ढिलासुस्तीका कारण फिर्ता भएको बजेटको समेत क्षतिपूर्ति भराउनु पर्ने माग गरे ।
यस्तो छ योजनाको फेहरिस्त
मुलुक संघीय संरचनामा जानु अघिनै २०७३ साल मसिंर २१ गते सडक डिभिजन कार्यालय दमकसँग नागार्जुन निलगिरी जेभीले ७ करोड ९० लाख रुपैयाँको लागतमा ११ किलोमिटर ५ मिटर लामो सो सडक २०७५ जेठ २१ मा निर्माण सम्पन्न गर्ने गरि सम्झौता गरेको थियो ।
त्यसबीचमा योजना अलपत्र पार्दै सम्बन्धित निकायले छैठौं पटक सम्म निर्माण कम्पनीलाई सो योजना सक्ने म्याद थप गरिििदँदै गयो । पछिल्लो पटक थप भएको म्याद सकिएको पनि अहिले २ बर्ष ६ महिना वितिसकेको छ । यसबीचमा सो योजनाको निर्माण कम्पनीले ४ करोड ६८ लाख रुपैयाँ भुक्तानी लिइसकेको छ । सडकको करिब साढे ४ किलोमिटर खण्ड मात्रै कालोपत्रे भएको छ जुन कालोपत्रे भत्किएर जीर्ण भइसक्यो । योजनाको भौतिक प्रगति ६० प्रतिशत र वित्तीय प्रगति ५९ प्रतिशत मात्रै भएको छ । योजनामा आवश्यक बजेट पटक पटक सरकारले विनियोजना गरेको भएपनि निर्माण कम्पनीले काम नगर्दा बर्षेनी फिर्ता हुँदै गएको पाइन्छ । प्रिमियर प्रविधिको कालोपत्रे गर्नुपर्ने सो योजनास्थलमा पर्ने शिवसताक्षी २ का वडाध्यक्ष भिमबहादुर नेम्वाङले सो योजना सम्पन्न गर्न आवश्यक थप बजेटको सुनिश्चीतता गरेर योजना कार्यान्वयनमा आम उपभोक्ताहरुलाई विश्वस्त दिलाउन मन्त्रालय र विभागको ध्यानाकर्षण गराउनु भयो ।
