दमक/ झापाको दमकमा एक महिलाले आफ्नो शरीरमा पेट्रोल छर्केर आगो लगाई आत्मदाहको प्रयास गरेकी छन् ।
आज दिउँसो ४.३० बजे दमक नगरपालिका वडा नं १ भानु चोक नजिकै बसोबास गर्दै आएका मनोज साहकी श्रीमती ३० वर्षीया शोभा साहले आफ्नै तीनतले पक्की घरको दोस्रो तलामा आफू सुत्ने कोठाको ढोका थुनेर पेट्रोल आफ्नो शरीरमा छर्की आगो लगाएकी हुन् ।
घाइतेलाई दमक अस्पताल दमकमा ल्याई सामान्य उपचारपश्चात थप उपचारको लागि वीपी कोइराला स्वास्थ्य विज्ञान प्रतिष्ठान धरान पठाइएको छ ।
शोभा मनोजकी कान्छी श्रीमती हुन् । पहिलो श्रीमतीको निधन पछि मनोजले केही समय अघि भारतबाट शोभालाई बिहे गरेर ल्याएका हुन् । करिब एक महिना अघि शोभाले मनोजकी पहिलो श्रीमती तर्फकी नाबालिका छोरी समेतलाई लिएर वेपत्ता भएकी थिइन् ।
उनी वेपत्ता भएको घट्ना प्रहरीमा समेत जानकारी गराइएको थियो । नाबालिकासहित वेपत्ता भएकी उनले ति बालिकालाई पानीट्याङकी नजिकैको खुल्ला ठाउँमा छोडेर भागेको दृश्यका आधारमा भारतीय प्रहरीले खोजी गरेको थियो । सो पछि उनी कहिले घर फर्किएकी थिइन् ? भन्नेबारे सार्वजनिक नभई सोमबार अकस्मात सो घट्ना भएको हो । घट्नाका कारण बोल्न नसक्ने अबस्थामा पुगेकी उनको शरीरको ३० प्रतिशत भन्दा बढी भाग जलेको प्रारम्भिक अनुमान गरिएको छ ।
प्रहरीले घट्नाबारे अनुसन्धान भइरहेको जनाएको छ ।
