दमक/ झापाको १५ वटै स्थानीय तह (पालिका)हरुमा राष्ट्रिय प्रजातन्त्र पार्टी (राप्रपा)ले पालिकास्तरीय अधिवेशन सम्पन्न गरेको छ । अधिवेशन मार्फत पालिकास्तरमा पार्टीको आगामी कार्यकालका लागि नयाँ नेतृत्व चयन भएको राप्रपा झापाले जनाएको छ ।
अधिवेशनबाट पार्टीको मेचीनगर समितिको चन्द्र निरौलाको अध्यक्षतामा, बुद्धशान्ती गाउँ समिति गणेश प्रसाद खरेलको अध्यक्षतामा , अर्जुनधारा नगर समिति हर्कजंग लिम्बूको अध्यक्षतामा र बिर्तामोड नगर समिति लक्ष्मी गौतमको अध्यक्षतामा बनेको छ ।
त्यसैगरी पार्टी अध्यक्ष राजेन्द्र लिङदेनको गृह नगर भद्रपुरमा राजकुमार राईको अध्यक्षतामा नगर समिति चयन भएको छ भने कचनकवल गाउँसमितिको अध्यक्षमा लक्ष्मी नारायण यादव, हल्दिबारी गाउँ समितिको अध्यक्षमा मदन मगर, बाह्रदशी गाउँ समितिको अध्यक्षमा पि बी कटवाल चुनिनु भएको छ ।
त्यस्तै दमक नगर समितिको अध्यक्षमा पुनः हेम सुवेदी कन्काइ नगर समितिको अध्यक्षमा गोपाल चुडाल, झापा गाउँ समितिको अध्यक्षमा प्रेम प्रसाईं, शिवसताक्षी नगर समितिको अध्यक्षमा मणि खड्का, गौरीगन्ज गाउँ समितिको अध्यक्षमा नन्दु थापा र गौरादह नगर समितिको अध्यक्षमा शान्तिराम पौडेल तथा कमल गाउँ समितिको अध्यक्षमा खड्ग श्रेष्ठ चुनिनु भएको राप्रपा झापाले जनाएको छ ।
पार्टीको पूर्व निर्धारित कार्यक्रम अनुसार गाउँ/ नगर अधिवेशन सम्पन्न भईसकेकाले अब प्रदेश सभा क्षेत्र र संघीय निर्वाचन क्षेत्रस्तरको अधिवेशन गरेर पार्टी संगठनलाई चलायमान बनाउँदै आगामी निर्वाचन केन्द्रित गतिबिधिहरु अघि बढाइने राप्रपाले जनाएको छ । २०७४ मा राप्रपाले झापाका तीन पालिका ( हल्दीबारी, गौरीगञ्ज र कचनकवल)मा नेतृत्व जितेको थियो २०७९ मा गौरीगञ्ज र कचनकवल गाउँपालिकामा नेतृत्व गुमाएको थियो भने २०७९ मा राप्रपाले कांग्रेस–माओवादी लगायतका दलसँग स्थानीय चुनाव गठबन्धन गरेर दमक नगरपालिकाको नेतृत्व जितेको छ ।
