सिन्धुली/ सिन्धुली जिल्लाको गोलञ्जोर गाउँपालिका–६ स्थित भण्डास बिप्पर कटेरीमा एकै परिवारका १६ जना सदस्य रहस्यमय ढंगले बेपत्ता भएका छन् ।
५६ वर्षीया उर्मिला हायुको परिवारका छोरा, बुहारी, छोरी र ज्वाइँसहित १६ जना तीन दिनदेखि सम्पर्कविहीन रहेको गाउँपालिका वडा नम्बर ६ का वडाध्यक्ष रवीन श्रेष्ठले जानकारी दिए ।
श्रेष्ठका अनुसार हायु परिवारका १८ जना सदस्यमध्ये दुई जना (एउटी छोरी काठमाडौंमा, एक बुहारी विदेशमा) बाहेक बाँकी सबै जनासँग हालसम्म कुनै सम्पर्क हुन सकेको छैन । परिवारका सदस्यहरूले बुधबार वा बिहीबार सामाजिक सुरक्षा भत्ता स्वरूप झन्डै ८ लाख रुपैयाँ बुझेर आएको र त्यसको भोलिपल्टदेखि उनीहरू बेपत्ता भएका हुन् ।
छिमेकीहरूले घर नजिकै गोठमा बाँधिएको पाडो तीन दिनदेखि ओइलिएको अवस्थामा देखेपछि शंका गरी घरमा खोजी गर्दा सोमबार बिहान मात्रै उनीहरू बेपत्ता भएको खुलासा भएको हो ।
घरको भान्सामा सामान्य आगलागी भएको देखिएको छ भने भाँडामा काटेर राखिएको सुँगुरको मासु फेला परेको छ । घरका जनावरहरू भैंसी, बाख्रा, कुखुरा आदि भने अलपत्र अवस्थामा फेला परेका छन् ।
वडाध्यक्ष श्रेष्ठले दिएको जानकारीअनुसार उर्मिला हायुका श्रीमानको गत वर्ष निधन भएको थियो र परिवारले केही समयअघि मात्र बैंकबाट ऋण लिएको थियो । भत्ता पाएपछि बैंकले लिन आउँछ भनेर हिँडेको हुन सक्ने वा अन्य कुनै घटनाको सिकार भएको पनि हुनसक्ने आशंका गरिएको छ ।
