दमक/ नेपालका प्रथम जननिर्वाचित प्रधानमन्त्री विश्वेश्वरप्रसाद कोइराला (बीपी) को ४३ औं स्मृति दिवस आज देशभर विभिन्न कार्यक्रम गरी मनाइँदैछ । नेपालमा प्रजातन्त्र स्थापनाका लागि कठोर सङ्घर्ष गरेका नेपाली कांग्रेसका संस्थापक कोइरालाको २०३९ साउन ६ गते निधन भएको थियो ।
यस दिनलाई नेपाली कांग्रेससहित साहित्यीक क्षेत्र सम्बन्धि संघ संस्थाहरुले अत्यन्तै महत्वपूर्ण दिनका रुपमा लिने गर्छन । नेपाली साहित्यका क्षेत्रमा पनि कोइरालाको महत्वपूर्ण योगदान रहेको छ ।
विश्वेश्वरप्रसाद कोइरालाको जन्म १९७१ भदौ २४ गते भएको थियो । वि.सं. २०१५ को संसदीय निर्वाचनपछि वि.सं. २०१६ जेठमा उहाँ नेपालको पहिलो निर्वाचित प्रधानमन्त्री बन्नु भएको थियो । प्रधानमन्त्रीत्वकालमा उहाँले बिर्ता उन्मूलन र जग्गा जोत्नेको हुनुपर्छु भन्ने भूमिसुधार कार्यक्रम अगाडि बढाउनु भएको थियो ।
वि.सं. २०१७ पुस १ गते शाही नेपाली सेनाको शक्तिका भरमा जननिर्वाचित सरकार अपदस्त गरिएपछि कोइरालालगायत नेतालाई सिंहदरबारमा बन्दी बनाइएको थियो । एक महिनापछि उनीहरूलाई सुन्दरीजल बन्दीगृहमा सारिएको थियो, जहाँ कोइराला, संसद्का प्रथम सभामुख कृष्णप्रसाद भट्टराई, नेता गणेशमान सिंहलगायतका मन्त्रीहरूलाई बन्दी बनाइएको थियो ।
वि.सं. २०२५ मा स्वास्थ्य परीक्षणका लागि जेलमुक्त भएपछि कोइरालाले आठ वर्षसम्म भारतमा निर्वासित जीवन बिताउनु परेको थियो ।
भारतमा निर्वासित भएर प्रजातन्त्र पुनःस्थापनाका पक्षमा सङ्घर्ष गर्दा राष्ट्रियता कमजोर भएको विश्लेषण गरी आठ वटा ज्यान मुद्दाको परवाह नगरी २०३३ साल पुस १६ गते राष्ट्रिय एकता तथा मेलमिलापको नीति लिएर उनी स्वदेश फर्किनु भएको थियो ।
नेपाली साहित्यमा मनोवैज्ञानिक यथार्थवादी धाराका प्रवर्तक कोइरालाका डेढ दर्जन कृति प्रकाशित छन्। उनका ‘तीन घुम्ती’, ‘मोदी आइन’, ‘हिटलर र यहुदी’, ‘सुम्निमा’, ‘नरेन्द्रदाई’ र ‘बाबु, आमा र छोरा’ गरी छ वटा उपन्यास प्रकाशित छन्। उनका दुई कथा सङ्ग्रह ‘श्वेत भैरवी’ र ‘दोषी चश्मा’ प्रकाशित छन् भने हरिप्रसाद शर्माको सम्पादनमा ‘विश्वेश्वरप्रसाद कोइरालाका कथा र कविता’ पनि प्रकाशित छन्।् ।
वरिष्ठ अधिवक्ता गणेशराज शर्मासँगको वार्तामा आधारित ‘आत्मवृत्तान्त’, सुन्दरीजल बन्दी गृहमा बस्दाको दैनिकीमा आधारित ‘जेल जर्नल’, र वि.सं. २०३३ पुस १६ गते राष्ट्रिय एकता र मेलमिलापको नीति लिई स्वदेश फर्केपछि त्रिभुवन अन्तरराष्ट्रिय विमानस्थलबाट सिधैँ सुन्दरीजल बन्दीगृहमा लगिएपछि लेखिएको दैनिकी ‘फेरि सुन्दरीजल’ ले नेपालको तत्कालीन राजनीतिक अवस्थाको यथार्थ चित्रण गरेका छन् ।
सम्झनामा विभिन्न कार्यक्रम
यसैबीच वीपि स्मृति दिवसको अवसर पारेर वीपि कोइरालाको सम्झनामा आज नेपाली कांग्रेसले झापाको कमल गाउँपालिका वडा नम्बर ५ स्थित पर्यटकीयस्थलका रुपमा बिकास गरिँदै गरेको साधुहोली सिमसार क्षेत्रमा श्रमदानमा सरसफाई तथा बृहत वृक्षारोपण कार्यक्रम गर्दैछ ।
कांग्रेस कमल गाउँ समितिको आयोजनामा हुन लागेको सो कार्यक्रममा पार्टी, स्थानीय नेता, कार्यकर्ताहरुसहित स्थानीय संघ संस्था र सर्वसाधारण नागरिकहरु समेत सहभागीह हुने जनाइएको छ । नेपाली कांग्रेस झापा क्षेत्र नं ५ (ख) को प्रदेश सभा क्षेत्रीय समितिको आयोजनामा दमक नगर अस्पतालका बिरामीहरुलाई फलफूल वितरण गरिएको छ । प्रदेश सभा क्षेत्रीय सभापति रवि केसीका अनुसार अस्पतालका करिब ५० जना बिरामी तथा कुरुवाहरुलाई फलफुल वितरण गरिएको हो । कांग्रेस केन्द्रीय सदस्य महेन्द्रकुमारी लिम्बुको प्रमुख उपस्थितीमा आयोजित फलफुल वितरणमा सभापति केसीले सहभागीहरुलाई धन्यवाद व्यक्त गर्नु भएको थियो । कार्यक्रमका पार्टीका झापा जिल्ला उपसभापति शेरबहादुर भट्टराई, क्षेत्र नं ५ का सभापति ढुण्डीराज भण्डारीसहित पार्टीका विभिन्न तहका नेता, कार्यकर्ताहरुको सहभागिता रहेको जनाइएको छ ।
