मेडिकल व्यवसायी दुर्गा प्रसाईं दुईवटा साईबर अपराधसम्बन्धी मुद्दामा सफाइ पाएका छन् ।
जिल्ला अदालत काठमाडौंले बुधबार सुनाएको फैसलामा उनलाई विद्युतीय अपराध (साइबर क्राइम) को आरोपमा निर्दोष ठहर गरेको हो ।
न्यायाधीश डा. राजेन्द्र कुमार आचार्यको इजलासले सामाजिक सञ्जालमार्फत चरित्र हत्या गरेको र समाजमा घृणा फैलाउने अभिव्यक्ति दिएको आरोपमा दायर दुईवटा छुट्टाछुट्टै मुद्दामा प्रसाईंलाई सफाइ दिएको हो । उनीविरुद्ध रोशन सुवेदी र टीका संग्रौलाले जाहेरी दिएका थिए ।
अदालतको फैसलापछि प्रसाईंलाई साइबर क्राइमको अभियोगमा अब थप कारबाही नहुने भएको छ ।
तर, तिनकुनेमा भएको विध्वंसात्मक घटनामा संलग्न रहेको आरोपमा उनी हाल पनि थुनामा नै छन् । उक्त मुद्दामा छिनोफानो नभएसम्म उनलाई थुनामुक्त गरिने छैन ।
