दमक/ झापा र सुनसरीमा खोलामा पौडी खेल्ने क्रममा डुबेर तीन जनाको मृत्यु भएको छ । भद्रपुर ३ मेची खोलाको दोभानमा डुबेर एक जनाको र इटहरी उपमहानगरपालिका–१६ मा पर्ने मुर्रा खोलामा दुई जनाको मृत्यु भएको हो ।
कोशी प्रदेश प्रहरी कार्यालय विराटनगरका अनुसार भद्रपुर–२ का अर्जुन लिम्बुको १३ बर्षीय छोरा अर्पण लिम्बु मेची खोलाको दोभानमा साथीहरु संग पौडी खेल्ने क्रममा डुबेर बेपत्ता भएकोमा प्रहरी चौकी किच्चकबदबाट खटिएको प्रहरी टोलीले उनको खोजी गर्ने क्रममा मृत अवस्थामा फेला पारेको हो ।
त्यस्तै असार २१ गते मुरा खोलामा पौडी खेल्ने क्रममा इटहरी–१६ का रमेश खत्रीको ९ बर्षीय छोरा युनिस खत्री र इटहरी–५ का बुद्दी परियारको ११ बर्षीय छोरा हेम बहादुर परियारको त्यहाँस्थित पानी जमेको दहमा डुबेर मृत्यु भएको हो । इलाका प्रहरी कार्यालय पकलीबाट खटिएको प्रहरी टोलीले दुबै बालकको उद्दार गरी उपचारको लागि सान्बी सिटी अस्पताल इटहरी पुरयाउने साथ चिकित्सकले मृत घोषित गरेका थिए ।
