कमल/ कमल गाउँपालिका भित्र पुर्वाधार विकासको कामले फड्को मारेको छ ।
पूर्वाधारसँगै गाउँपालिका शिक्षा, स्वस्थ्य, कृषी ,युवा स्वारोजगार,महिलाको क्षमता विकासमा समेत अब्बल देखिएको छ ।
पुर्वाधार तर्फ कमल गाउँपालिकामा कालोपत्रे सडक सञ्जालले सबै वडालाई जोडिएको छ । चालु आर्थिक वर्ष २०८२÷०८३ मा मात्र गाउँपालिकाको आन्तरिक श्रोतबाट ७ किलोमिटर , संघ र प्रदेशबाट थप करीब ९ किलोमिटर गरि जम्मा १६ किलोमिटर सडक कोलोपत्रे भएको गाउँपालिका पूर्वाधार शाखा प्रमुख इञ्जीनियर सागर यादवले जानकारी दिनु भयो ।
कलोपत्रे भएका सडकमा आदित्य टोल खानेपानी सडक, दही चौक –जीवन चौक हुदै क्याम्पा जोड्ने सडक, पाथीभरा मार्ग, रेडक्रस जोड्ने सडक, बाह्रविघे महाभारा सडक, क्याम्पा समायगढ चौक लगायतका सडक कालोपत्रे भएका छन् ।
गाउँपालिकाको प्रशासनिक भवनको पहिलो तला सम्मको निर्माण कार्य सम्पन्न भएको छ भने दोश्रो तला निर्माणाधिन अवस्थामा रहेको र वडा नम्बर ६ मा आधारभुत स्वास्थ्य चौकी भवनको निर्माण कार्य समेत धमाधम अघि बढेको गाउँपालिका अध्यक्ष हुकुमसिंह राईले बताउनु भयो । उहाँले हरेक पूर्वाधार निर्माणमा कमल गाउँपालिकाबासीले प्रत्यक्ष चासो र सरोकार राख्दै निर्माणको गुणस्तरबारे सम्बन्धित निर्माण कम्पनी र नियमनकारी निकायलाई खबरदारी गर्ने काम भने जारी राख्नु पर्ने अवस्था रहेको उल्लेख गर्नु भयो ।
निर्माणको गुणस्तरमा स्थानीय सरकारले कसैसँग पनि कुनै किसिमको सम्झौता नगर्ने अध्यक्ष राईको प्रतिबद्धता छ । गाउँपालिका उपाध्यक्ष एवं योजना अनुगमन समिति संयोजक प्रमिला न्यौपाने तिवारीले निर्माणाधीन योजनाहरुमा अनुगमन समितिले अनुगमन निर्देशिका अनुसार तीन चरणमा अनुगमन गर्ने काम भइरहेको जानकारी दिनु भयो ।
अन्य पूर्वाधारतर्फ कमल ५ मा राधा गौर गोविन्द मन्दिरको भवन निर्माण भइरहेको छ । त्यस्तै वडा नम्वर २ मा महेन्द्ररत्न माध्यमिक विद्यालयको गेट निर्माण सहित खेल मैदानको स्तरउन्नती योजना सञ्चालनमा छ भने गुरुङ्गटोल सडक कालोपत्रे , सिता चौक नौलो चौक सडक कालोपत्रे गर्ने काम सम्पन्न भएको गाउँपालिकाको पूर्वाधार शाखाले जनाएको छ ।
कमल गाउँपालिकाले गाउँपालिका भित्र संचालनमा रहेका सबै सामुदायिक विद्यालयहरुमा सके सम्म एक रुपता ल्याउनका लागि सबै विद्यालयमा पहेलो रङ लगाइएको छ ।
भौतिक पुर्वाधार तर्फ सभाहल सहितका भवन निर्माण भएका छन् भने विद्ययालयमा सुविधा सम्पन्न शौचालय निर्माण गर्ने काम भइरहेको छ ।
विद्यालयको अनुगमनलाई प्रभावकारी बनाउन सीसी क्यामेरा जडान गरिएको छ । त्यस्तै विद्याार्थीलाई अतिरिक्त कृयाकलापका लागि नृत्य र भलिवल प्रशिक्षक नियुक्ति गरेको गाउँपालिका शिक्षा युवा तथा खेलकुद शाखा प्रमुख सुर्य प्रसाद न्यौपानेले जानकारी दिनुभयो ।
