दमक/ विश्व बिद्यालय अनुदान आयोग (युजीसी)को सहयोगमा पूर्व क्षेत्रका सामुदायिक क्याम्पसका प्राध्यापकहरुको क्षमता बिकासका लागि महत्वपूर्ण तालिम झापाको दमकमा शुरु भएको छ ।
आयोगको परियोजना सञ्चालनमा रहेका झापा, मोरङसहित पूर्व क्षेत्रका विभिन्न जिल्लाका १३ वटा सामुदायिक क्याम्पसका प्रतिनिधिमुलक ३० जना प्राध्यापकहरु सम्मिलित सो तालिम दमक बहुमुखी क्याम्पसको आयोजनामा शुरु भएको हो ।
६ दिन सम्म सञ्चालन हुने सो तालिमको मंगलबार उदघाटन गर्दै विश्व बिद्यालय अनुदान आयोगका अध्यक्ष प्राध्यापक डा. देवराज अधिकारीले देशभरका ८४ वटा सामुदायिक क्याम्पसहरुको अवस्था दयनीय रहेको उल्लेख गरे । अध्यक्ष प्रा.डा. अधिकारीले नेपालको उच्च शिक्षामा बिद्यार्थीहरुको आकर्षण घट्दै जानुले समग्र मुलुकको अवस्था चिन्ताजनक भएको बुझ्न सकिने भएकाले यसको जड अर्थात कारण पहिचान गरिनुपर्नेमा जोड दिए ।
उनले हालै विदेशका युनिभर्सिटीहरुमा अध्ययनका लागि जान लागेका ३ सय ९३ जना बिद्यार्थीहरुसँग गरिएको सोध अनुसन्धानले नेपालको शैक्षिक गुणस्तरका कारण उनीहरु विदेश अध्ययनका लागि जान लागेका नभई यहाँको सामाजिक र राजनीतिक कारणले जान लागेको तथ्य पहिचान भएको अध्यक्ष प्रा.डा अधिकारीले सार्वजनिक गरे ।
शिक्षालाई विश्वसनीय र विश्व बजारमा बिक्ने र टिक्ने गुणस्तरको बनाउन नीतिगत पहलको खाँचो रहेको कार्यक्रमका वक्ताहरुले जोड दिए । उनीहरुले रोजगारसहितको शिक्षा अर्थात कमाउँदै पढ्दै गर्ने किसिमको शिक्षा भए नेपाली बिद्यार्थीहरुको विदेश पलायन रोक्न सकिने साझा धारणा राखे ।
दमक बहुमुखी क्याम्पस सञ्चालक समितिका अध्यक्ष ढुण्डीराज भण्डारीको अध्यक्षतामा भएको उदघाटन कार्यक्रममा दमक नगरपालिकाका प्रमुख रामकुमार थापा, आयोगका सल्लाहकार एवं तालिमका मुख्य प्रशिक्षक प्राध्यापक डाक्टर ह्रदयराज बज्राचार्य, पब्लिक क्याम्पस कोशी प्रदेशका कार्यवाहक अध्यक्ष अर्जुन अधिकारी, दमक बहुमुखी क्याम्पसका सञ्चालक समितिका पूर्व अध्यक्ष सुरेश सुब्बा, सदस्य अम्बिका खनाल लगायतले सञ्चालित तालिमको उपयोगिताका विषयमा चर्चा गरेका थिए ।
दमक बहुमुखी क्याम्पसका प्रमुख यज्ञराज गिरीले स्वागत मन्तव्य राखेको सो कार्यक्रमको सञ्चालन सञ्चालन प्राध्यापक डिल्लीप्रसाद भट्टराईले गरेका थिए ।
