दमक/ सामाजिक सेवाका क्षेत्रमा क्रियाशील अन्तर्राष्ट्रिय सञ्जाल भएको सामाजिक संस्था लायन्सको नयाँ कार्यकाल आज जुलाई १ बाट विश्वभर सुरु भएको छ ।
लायन वर्ष २०२५/२६ का संसारभरका लायन गभर्नरहरुले र उनीहरु मातहतका लायन्स क्लबहरुका नेतृत्वले आफ्नो कार्यकालका लागि विभिन्न योजनासहित जुलाई १ बाट कार्यकाल सुरु गरेका छन् ।
यसै सन्दर्भमा झापाको गौरादह क्षेत्रमा क्रियाशील लायन्स क्लब अफ गौरादहको प्रेसिडेन्टका रुपमा सो क्लबको नेतृत्व विनिता अधिकारी (कट्वाल)ले लिएकी छिन् ।
सामाजिक तथा धार्मिक परिवारकी एक सदस्य उनले आफ्नो कार्यकालको पहिलो दिन मंगलबार एक जना दलित बिद्यार्थीको प्लस टु (कक्षा ११–१२ ) को शैक्षिक खर्च ब्योहेर अभिभावकत्व लिँदै शुरु गरेकी छिन् । लायन्स चिल्ड्रेन पार्क गौरादहमा आज आयोजित कार्यक्रमबीच अध्यक्ष कटवालले गौरादह १ की सन्ध्या शिवा दर्जीको उच्च शिक्षाका लागि शैक्षिक सहयोग गरेकी हुन् । सन्ध्या गौरादहस्थित अमर माविबाट यस बर्षको एसइइ परीक्षामा ३.४ जीपिए हासिल गरेर उच्च शिक्षाका लागि योग्य बनेकी हुन् ।
