दमक/ मेची राजमार्ग अन्तरगत पाँचथरको फिदिम नगरपालिका–४ र हिलिहाङ गाउँपालिका–७ स्थित हेवा खोलामा रहेको निर्माणाधिन बेलीब्रीज भाँच्चिदा तीन जना कामदारको मृत्यु भएको छ ।
घट्नामा ३ जना गम्भिर घाईते भएका छन ।
मृत्यु हुनेमा बारा सिमरा उप–महानगरपालिका–१२ का २२ बर्षीय रुपलाल चौधरी, २७ बर्षीय राजन चौधरी र २२ बर्षीय राकेश चौधरी रहेका छन ।
जेठ ३१ गते बेलुका बेलीबृज जडान गर्ने क्रममा अचानक भाँचिदा घाईते भएका कामदारहरुलाई जिल्ला प्रहरी कार्यालय पाँचथरबाट प्रहरी नायव उपरीक्षक कौशल कुमार बुढाथोकी सहितको प्रहरी टोलीले तत्काल उद्धार गरी उपचारको लागि विराटनगरस्थित नोवेल अस्पताल पठाएको थियो । उपचारका क्रममा उनीहरुको मृत्यु भएको कोशी प्रदेश प्रहरी कार्यालय विराटनगरले जनाएको छ । गम्भिर घाईते भएका बारा सिमरा उप–महानगरपालिका–१२ का २५ बर्षीय भुनेश्वर चौधरी, ३५ बर्षीय प्रकाश चौधरी र ३० बर्षीय अभिषेक चौधरीको सोही अस्पतालमा उपचार भईरहेको छ ।
यसैबीच सरकारले सो बेलीब्रीज भाँचिएको घटनाको छानबिन गर्न समिति बनाएको छ । मेची राजमार्गको फिदिम–ताप्लेजुङ् सडक खण्डमा पर्ने फिदिम ४ र हिलिहाङ् ७ जोड्ने हेवा खोलामा निर्माणाधिन पुल भाँचिएको घटनाबारे छानविनका लागि भौतिक पूर्वाधार तथा यातायात मन्त्रालयले समिति गठन गरेको हो ।
मन्त्री देवेन्द्र दाहालले मन्त्री स्तरीय निर्णय गरि ५ सदस्यिय अध्ययन तथा छानविन समिति गठन गर्नु भएको हो ।
सडक विभागका उपमहानिर्देशक ललिजन खनालको संयोजकत्वमा गठित समितिमा संघीय सडक सुपरीवेक्षण तथा अनुगमन कार्यालय दमकका प्रमुख विनोदकुमार मौवार, सडक डिभिजन कार्यालय बुटवलका प्रमुख जीवेन्द्र मिश्र, दमक डिभिजन प्रमुख श्यामकुमार यादव र सडक विभागका सिडीई अमितकुमार वर्मा सदस्य रहनु भएको छ ।
समितिलाई सो पुल भत्कनुको कारण, भविष्यमा यस्ता घटना हुन नदिन अपनाउनु पर्ने सुझाव तथा सो स्थानमा तत्काल अस्थाई रुपमा यातायात सञ्चालन गर्ने विषयमा समेत स्थलगत अध्ययन तथा छानविन गरि ७ दिन भित्रमा प्रतिवेदन पेश गर्ने कार्यभार दिईएको छ । समितिले आईतबार देखिनै काम शुरु गरि सकेको जनाइएको छ ।
मन्त्री दाहालले सो अप्रत्याशित घट्नाप्रति दुःख व्यक्त गर्नु भएको छ । यस्तै घाईते मजदुरहरुको ज्यान गएको प्रति गहिरो समवेदना व्यक्त गर्नु भएको छ । उहाँले उपचारात घाईतेहरुको उपचारमा कुनै कमि हुन नदिने गरि व्यवस्था मिलाउन मन्त्रालयका सचिव केशवकुमार शर्मा तथा सडक विभागका महानिर्देशक डा. बिजय जैसीलाई निर्देशन समेत दिनु भएको छ ।
