दमक/ झापाको गौरादह ५ बाट २०५९ सालदेखि दमकमा आएर व्यवसायिक क्षेत्रमा हात हालेका युवा व्यवसायी देवेन्द्र बरालले समयको मागलाई धान्नका लागि व्यवसाय विस्तार गरेका छन् । यसअघिदेखिनै गर्दै आएको ब्यागको होलसेल तथा खुद्रा व्यापारलाई बरालले दमक ६ स्थित घिमिरे मार्केटमा विस्तार गरेका हुन् ।
उनले सञ्चालनमा ल्याएको श्रेया सप्लायर्सको आज बुधबार बैदिक विधि अनुसार उदघाटन गरिएको छ । बयोबृद्धा माता चन्द्रकुमारी बरालको हातबाट आशिर्वाद लिँदै बरालले औपचारिक रुपमा विशेष गरी महिला तथा बालबालिका लक्षित आधुनिक डिजाइनका विभिन्न खाले ब्याग, छाता, बेल्ट लगायतका सामानको फिक्स प्राइज ( निश्चित मूल्य) को पसल सञ्चालनमा ल्याएका हुन् ।
उदघाटनका अवसरमा दमक उद्योग वाणिज्य संघका अध्यक्ष गोपाल गुरागाइँ, पूर्व अध्यक्ष प्रकाश प्रसाइँ, सल्लाहकार संयोजक राजकुमार श्रेष्ठ, संघका वरिष्ठ उपाध्यक्ष राजु खड्का, प्रथम उपाध्यक्ष राजकुमार योङया, तृतीय उपाध्यक्ष रुवल अधिकारी, संघका कार्यसमिति सदस्य तथा युवा व्यवसायीहरु हेमसिंह अधिकारी, सञ्जिब बराल, नेपाल पत्रकार महासंघका केन्द्रिय प्रतिनिधि परिषद सदस्य बिष्णु सुब्बा, समाजवादी प्रेस संगठनका केन्द्रिय सदस्य अनिलदेव राई लगायतले व्यवसायी बराललाई शुभकामना दिएका छन् ।
व्यवसायीहरुमाझ लोकप्रिय र सामाजिक युवा व्यक्तित्व बरालले आफ्नो व्यवसायिक क्षेत्रको मुख्य प्रेरक व्यक्तित्वका रुपमा आफ्नी दिदी जमुना बराललाई पाएको र उहाँकै प्रेरणाबाट व्यवसाय क्षेत्र रोजेर अघि बढेको उल्लेख गरे । उनले पछिल्लो समय महिला तथा बालबालिकाहरुको रोजाईमा हाते पर्सदेखि अन्य किसिमका आकर्षक र फेसनेवल र गुणस्तरीय ब्याग आइटमहरु रहेकाले बजारमा रहेको मागका आधारमा आफूले यो व्यवसायलाई परिमार्जन गर्दै विस्तार गरेको बताएका छन् ।
