दमक/ माता औंसीको सन्दर्भ पारेर आज झापाको दमकमा १३० जना आमाहरुलाई सम्मान गरिएको छ ।
जेष्ठ नागरिक सम्मान प्रतिष्ठानसँगको समन्वयमा प्रतिष्ठानको दमक ५ स्थित केन्द्रिय कार्यालयमा औपचारिक कार्यक्रमसहित सम्मान गरिएको हो ।
दमक नगरपालिकाकी उपप्रमुख रेगिना भट्टराई प्रसाइँको प्रमुख आतिथ्यमा आयोजित कार्यक्रममा दमक नगरपालिका, कमल गाउँपालिका र शिवसताक्षी नगरपालिकाका १ सय ३० जना जेष्ठ आमाहरुलाई सम्मान गरिएको हो ।
आमाहरुलाई पस्मिनाको दोसल्ला ओढाएर सम्मान गर्दै नगर उप प्रमुख भट्टराईले अहिले धेरै आमाबुबाहरु परदेशमा रहेका आफ्ना सन्तानको सम्झनामा तडपिनु परिरहेको अवस्थाले आफूलाइ सधैं चिन्तित बनाउने गरेको बताइन् ।
सन्तानहरु बिदेशीएको भन्दै घरमा आमा बुबा मात्रै रहने अवस्था आउनु दुखद भएको भन्दै उनले समाजमा रहेका सामाजिक संघ संस्थाहरुनै सन्तानकै रुपमा रहेको उल्लेख गरिन् ।
घरमा एक्लै बस्नु पर्ने अवस्थामा जेष्ठ नागरिक जस्ता संस्थाले आमा बुबाहरुलाई आपसस् सुखदुख र भावना साटासाट गर्ने अवसर प्रदान गरेको बताइन् । दमकमा ज्येष्ठ नागरिक लक्षित सेवाहरु थपिने क्रममा रहेको उपप्रमुख भटट्राईले जानकारी दिइन् ।
जेष्ठ नागरिक सम्मान प्रतिष्ठानका अध्यक्ष दुर्गा पौडेलको अध्यक्षतामा भएको कार्यक्रममा सहभागी आमा बुबाहरुलाई मिष्ठान्न भोजन समेत गराइएको थियो ।
