दमक/ झापाको कमल गाउँपालिका अध्यक्ष हुकुमसिंह राईले शिक्षकहरुलाई राजनीतिक दलको सदस्यता त्याग्न सुझाव दोहोरयाएका छन् ।
शिक्षकहरुको जारी आन्दोलनका कारण सामुदायिक बिद्यालयको पठनपाठनमा अवरोध पुगेको र यसबाट शिक्षकहरुमाथिनै राजनीतिक कोणबाट नकारात्मक टिकाटिप्पणी हुन थालेकोप्रति लक्षित गरेर अध्यक्ष राईले त्यस्तो सुझाव दोहोरयाएका हुन् ।
अध्यक्ष राईले सामाजिक सञ्जाल फेसबुकमार्फत शिक्षकहरुमाझ त्यस्तो सुझाव राखेका हुन् ।
दुई बर्ष अघिनै कमल गाउँपालिका भित्रका सामुदायिक बिद्यालय हाता भित्र राजनीतिक गतिबिधि गर्न रोक लगाउने नीतिगत निर्णय लिएका कमल गाउँपालिकाका शिक्षा समिति संयोजक समेत रहेका अध्यक्ष राईले जारी शिक्षकहरुको राष्ट्रिय आन्दोलनमा उठेका जायज मागहरुलाई समेत पार्टी कार्यकर्ताहरुको मागका रुपमा बुझिन थाल्नु दुर्भाग्य भएको टिप्पणी समेत गरेका छन् । कमल गाउँपालिकाले गत बर्षनै सामुदायिक बिद्यालयका शिक्षक, पालिकाका कर्मचारी र जनप्रतिनिधिहरुका छोराछोरीलाई अनिवार्य सामुदायिक बिद्यालयमै पढाउने व्यवस्था मिलाउन निर्देशन गरेको थियो ।
नेपाली कांग्रेसका नेता समेत रहेका अध्यक्ष राईले यसअघि कांग्रेसको पार्टी क्रियाशील सदस्यता नविकरणको क्रम शुरु हुँदानै शिक्षकहरुलाई पार्टी सदस्यता नविकरण नगरी शैक्षिक क्षेत्रलाई राजनीतिक प्रभावमुक्त बनाउने अभियानमा सहयोग गर्न आग्रह गरेका थिए ।
पछिल्लो समय राज्य र समुदायको समेत लगानी रहेको सामुदायिक बिद्यालयको शैक्षिक सुधारको बाधक राजनीतिनै भएको शिक्षा सम्बद्ध सरोकारवालाहरुले निष्कर्ष निकाल्दै आएका छन् ।
