पूर्वमा मेघगर्जनसहित बर्षा भएको छ । सुख्खायाममा भएको बर्षाका कारण किसानहरुले राहतको महसुस गरेका छन् । लामो समयको सुक्खा र खडेरीले आहत भएकाहरुलाई यो वर्षाले केही राहत दिएको किसानहरु बताउँछन् । मोरङको केराबारीमा गत २४ घण्टामा २५७ मिलिमिटर वर्षा भएको जल तथा मौसम विज्ञान विभागले जनाएको छ ।
कतैकतै असिना पानी, चट्याङ र पहिरोको कारण भने नागरिकहरु समस्यामा परेका छन् ।
मौसमविद गोविन्द झाले पर्सिदेखि मौसममा क्रमिक सुधार हुने बताए । आजको तुलनामा भोलि र भोलिको तुलनामा पर्सि कम पानी पर्ने उनको भनाइ छ ।
हाल देशमा न्यूनचापीय प्रणाली र स्थानीय वायुको प्रभाव रहनुको साथै बङ्गालको खाडीबाट भित्रिरहेको जलवाष्पयुक्त हावाको समेत प्रभाव रहेको मौसम पूर्वानुमान महाशाखाले जनाएको छ ।
मौसमविद झाले लगातार भने पानी नपर्ने बताए । केहीबेर रोकिने अनि फेरि पर्ने क्रम दिनभरि नै रहने उनको भनाइ छ । पूर्वदेखि सुदूरपश्चिमसम्मै वर्षा भइरहेको झाले बताए ।
अधिकांश ठाउँमा हल्कादेखि मध्यम खालको वर्षा भएको छ ।
