दमकको सामुदायिक बिद्यालय व्यवस्थापन समिति महासंघका अध्यक्ष समेत रहेका सरस्वती आधारभूत बिद्यालय दमक २ का बिद्यालय व्यवस्थापन समिति अध्यक्ष रमेश गुरागाइँ बिद्यालयमा बिद्यार्थीहरुको आकर्षण र अभिभावकहरुको विश्वास बटुल्न यतिबेला सडक नाटकसहित समुदायमा पुगिरहेका छन् । उनले बिद्यालय आसपासका अभिभावकहरुमाझ गएर सामुदायिक बिद्यालयको गुणस्तरमा कुनै कमि आउन नदिने प्रतिबद्धतासहित आफ्ना नानीबाबुहरु सामुदायिक बिद्यालयमै पढन पठाउनका लागि अनुनय विनय गरिरहेका छन् ।
बोर्डिङ स्कूलका मालिक भन्दा धेरै मेहेनत गरेर उनी सामुदायिक बिद्यालयको स्तर उकास्न बिगत ३/४ बर्षयता क्रियाशील छन् । समुदायलाई बिद्यालयमा जोडेर उनले बिद्यालयको शैक्षिक अवस्थामा उल्लेखिय सुधार ल्याउन भुमिका पनि खेलिरहेका छन् । यता दमकको स्थानीय सरकार भने बोर्डिङ स्कूलले लिने शुल्क बढाउन प्रेरित गर्दै बोर्डिङ स्कूलहरुको वर्गीकरण र शुल्क निर्धारण गरिरहेको छ ।
बोर्डिङ स्कूललाई शुल्क बढाउन सहज
हाल कायम शुल्क बढाउन सहज बनाउँदै झापाको दमक नगरपालिकाले नगरमा सञ्चालित कूल ६० वटा संस्थागत तथा निजी बिद्यालयहरुको वर्गीकरण गरेको छ ।
स्थानीय सरकारले नगरका १३ वटा बिद्यालयलाई क वर्गमा समावेश गरेको छ । त्यस्तै १३ वटालाई ख वर्गमा, ९ वटालाई ग वर्गमा २३ वटालाई घ वर्गमा समावेश गरेको छ । ४ वटा बिद्यालयलाई ननग्रेड अर्थात अवर्गीकृत सूचीमा राखेको छ । सार्वजनिक गरिएको दर भन्दा न्यून दरमा अहिले बिद्यालयहरुले शुल्क लिँदै आएका थिए । चलिरहेको फरक फरक शुल्क दर भन्दा डेढ गुणा सम्म दर बढाएर बिद्यार्थीका अभिभावकबाट रकम लिन पाउने सहज वातावरण बिद्यालयहरुका लागि नगरपालिकालेनै बनाई दिएको छ । क वर्गमा परेका बिद्यालयका लागि पीजिदेखि युकेजी सम्मको मासिक शुल्क दर ३ हजार ८ सय तोकिएको छ । सोही वर्गका बिद्यालयले सोही तह सम्मका कक्षामा बार्षिक शुल्क ७ हजार ६ सय लिन पाउनेछन भने सोही अनुसार कक्षा पिच्छे बढाउँदै कक्षा १० मा मासिक ५ हजार ८ सय रुपैयाँ सम्म मासिक शुल्क लिन पाउने भनि उल्लेख गरिदिएको छ । क वर्गका बिद्यार्थीसँग प्रमाण पत्र शुल्क नर्सरी सम्म ९ सय ५० लिन सकिने उल्लेख गरिएको छ भने परीक्षा शुल्क २ हजार २ सय रुपैयाँ तोकिएको छ ।
माध्यमिक तहको शिक्षा स्थानीय सरकार मातहतमा सञ्चालन हुने संविधानमानै उल्लेख भएपछि र निजी बिद्यालयहरुको शुल्क निर्धारण स्थानीय सरकारले गर्न सक्ने कानुनी व्यवस्थालाई आधार मानेर झापा जिल्लामानै पहिलो पटक दमक नगरपालिकाले यहाँका निजी बिद्यालयहरुको वर्गीकरणसँगै अधिकतम शुल्क दर पनि तोकिदिएको हो ।
नगरपालिका अन्तर्गतको नगर शिक्षा समितिको सिफारिसमा निजी बिद्यालयहरुले बिद्यार्थीका अभिभावकहरुबाट लिन पाउने शुल्क दर नगरपालिकाको शिक्षा शाखाले तोकिदिएपछि यसका बारेमा चौतर्फी भइरहेको आलोचनाका बिषयमा स्थानीय सरकारका जिम्मेवार पदाधिकारीहरु सार्वजनिक रुपमा बोलेका छैनन् ।
चौतर्फी विरोध र आलोचना खेप्दै
शैक्षिक तथा सामाजिक अगुवाहरु, नगर सभा सदस्य र बिद्यार्थीका अभिभावक, कतिपय राजनीतिक दलका नेतृत्वहरु समेत सामाजिक सञ्जालमा नगरपालिकाको शिक्षा शाखाद्धारा जारी गरिएको वर्गीकरण र शुल्क सूचीको विरोधमा उत्रिएका छन् ।
नगर सभा सदस्य समेत रहेका नेविसंघका केन्द्रिय सदस्य अतित वान्तवा राईले यो कदमको खुलेर विरोध गरेका छन् । उनले सामाजिक सञ्जालमार्फत यस किसिमको गम्भिर गल्ती तुरुन्त सच्याउन पनि खबरदारी गरेका छन् । अर्का पूर्व बिद्यार्थी नेता सन्तोष दुलालले पनि नगरपालिकाले गरेको बिद्यालयहरुको वर्गीकरण र शुल्क तोक्ने कामलाई नीतिगत भ्रष्टाचार भनेका छन् ।
उनले यसको कडा शब्दमा प्रतिवाद गरेका छन् । अर्का पूर्व बिद्यार्थी नेता समेत रहेका नेपाली कांग्रेस महासमिति सदस्य अइन्द्र केरुङले स्थानीय शिक्षा समितिले निजी बिद्यालयहरुलाई तहगत बर्गीकरण क्रममा आम दमकबासीको गम्भीर आरोप छ , दमक शिक्षा समितीले यो बिषयलाइ कसरी लिएको छ ? भनि सार्वजनिक रुपमा प्रश्न गरेका छन् ।
नेविसंघ, अनेरास्ववियु र अदिल क्रान्तिकारीले त यो बिषयलाई लिएर नगर प्रमुख राम थापाको कक्षमा पुगेर वर्गीकरण र शुल्क दर सम्बन्धिको निर्णय सच्याउन माग गरेका छन् ।
निजी तथा संस्थागत बिद्यालयहरुका सञ्चालकहरु र शैक्षिक लगानीकर्ताहरु भने आआफ्नो बिद्यालय उत्कृष्ट वर्गमा परेको ब्यहोरा सार्वजनिक गरिरहेका छन् ।
नगरपालिकाका शिक्षा अधिकृत सोम गुरागाइँको हस्ताक्षरसहित नगरपालिकाको आधिकारिक फेसबुक पेजबाट बोर्डिङ स्कूलको वर्गीकरण र शुल्क दरका बारेमा सूचना सार्वजनिक भए पनि सो सम्बन्धिको निर्णयको कुनै दस्तावेज नगरपालिकाको आधिकारिक वेवसाइटमा यो समाचार तयार पार्दा सम्म सार्वजनिक गरिएको छैन ।
बिद्यालयहरुले लिँदै आएको मासिक, शुल्क, भर्ना शुल्क , बार्षिक शुल्क, परीक्षा शुल्क र प्रमाण पत्र शुल्क अधिकतम उल्लेख गरेर यो विवरण सार्वजनिक गरिएको हो ।
