दमक/ दमक बहुमुखी क्याम्पस दमकमा गत ५ चैतमा सम्पन्न स्ववियू निर्वाचनमा संगठनले समानुपातिक तर्फ प्राप्त गरेको मतको आधारमा निर्वाचित हुने समानपातिक तर्फका उम्मेदवारको बिषयलाई लिएर बिबाद हुदा अनेरास्ववियुले क्याम्पसमा तालाबन्दी गरेको छ ।
संगठनको क्याम्पस इकाई समितीले सिफारिस गरेको नाम भन्दा फरक नाम निर्वाचन समितीले प्रकाशन गरेपछी निर्वाचन समितीको कार्यलय र क्याम्पस प्रमुखको कार्यकक्षमा ताला लगाएको अनेरास्ववियु क्याम्पस कमिटीका अध्यक्ष भिजन चेम्जोङले बताए ।
निर्वाचन समितिले सो संगठनको तर्फबाट संजय राई, गंगा प्रसाद खतिवडा र युनिक घिमिरेको नाम सार्वजनिक गरेको र अनेरास्ववियु दमक क्याम्पस कमिटीले सिफारिस गरेको पत्रमा अबिश खनाल, भिजन चेम्जोङ र संजय राईको नाम पठाईएको थियो । स्ववियू निर्वाचन समितीले संगठनको क्याम्पस इकाई कमिटीको सिफारिस लत्याएर पार्टीको पत्रको आधारमा नाम प्रकाशन गरिदिएका कारण सो विवाद उत्पन्न भएको बताइएको छ ।
अनेरास्ववियु क्याम्पस कमिटी अध्यक्ष चेम्जोङले यसअघि बुझाएको समानुपातिक उम्मेदवारको बन्द सुची विपरित एमालेको दमक नगर नेतृत्वले हस्तक्षेप गरेर फरक नाम पठाएको र निर्वाचन समितीले बिद्यार्थी संगठनको सिफारिस लत्याएर नाम प्रकाशित गरेको अनेरास्ववियुका क्याम्पस कमिटीका अध्यक्ष चेम्जोङले बताए ।
एमाले पार्टीको नगर नेतृत्व र बिद्यार्थी संगठनको तर्फबाट अलग अलग नाम बुझाइएको कारण निर्वाचन समितिमा अनेरास्ववियु केन्द्रिय कमिटीले पनि आधिकारिकताको ब्यहोरा उल्लेख गर्दै स्ववियु निर्वाचन समितिलाई पत्र पनि पठाएको सार्वजनिक भएको छ । केन्द्रिय कमिटी अध्यक्ष समिक बडालले १६ चैतमा निर्वाचन समितिलाई लेखेको पत्रमा भिजन चेम्जोङले बन्दसुचीबाट सिफारिस गरे बमोजिम आधिकारिकता प्रदान गरिदिन भनिएको छ ।
यसअघि चुनावको अघिल्लो दिन नेविसंघका तर्फबाट स्ववियु अध्यक्षका उम्मेदवार को आधिकारिक ? भन्ने बिषयमा आन्तरिक विवाद चुलिएको थियो । नेविसंघ भित्रको आन्तरिक विवादका कारण पनि क्याम्पसमा तालाबन्दी भएको थियो । सो तालाबन्दी खोलेर स्ववियु निर्वाचन सम्पन्न गरिएको थियो । अनेरास्ववियुले स्ववियु निर्वाचनमा अध्यक्ष पद जित्न सकेन भने संगठनले प्राप्त गर्ने समानुपातिक तर्फको मत भने सबैभन्दा धेरै प्राप्त गरेको थियो ।
अनेरास्ववियुका तर्फबाट निसम अधिकारी स्ववियु अध्यक्षमा उम्मेदवार थिए । उनी नेविसंघको केन्द्रिय नेतृत्वबाट सिफारिस गरिएको भुपेन्द्र बस्नेतसँग पराजित भएका थिए ।
