दमक/ राष्ट्रिय स्वतन्त्र पार्टीले शुक्रबार एकैदिन झापाका ठुला मध्येका तीन शहरमा बृहत जनसहभागितामा सभा सम्पन्न गरेको छ ।
दमक, गौरादह र विर्तामोडमा एकैदिन आयोजना गरेको जनसभालाई पार्टी सभापति रवि लामिछानेसहित महामन्त्री मुकुन्द ढकाल, संसदीय दलका प्रमुख सचेतक सन्तोष परियारसहित आधा दर्जन बढी केन्द्रिय नेताहरुले सम्बोधन गरेका छन । दमकमा आयोजित सभालाई सम्बोधन गर्दै सभापति लामिछानेले देशलाई यो अवस्थामा ल्याउन एक बर्ष अघि मात्रै स्थापना भएको आफनो पार्टीको कुनै दोष नभएको जिकिर गर्दै लामो समयदेखि राजकाज चलाएका ठुला भनिएका दलहरुको अकर्मण्यता यसको मुख्य कारण भएको तर्क गरे ।
मुलुकमा भइरहेको बिकास र समृद्धिमा अन्य दलहरुको योगदानबारे खासै नबोलेका सभापति लामिछानेले भ्रष्टचार, अनियमितता र देशको गिर्दो आर्थिक अवस्था लगायत सम्पूर्ण जिम्म अन्य ठुला दलहरुले लिनुपर्ने जिकिर गरे ।
दमकमा सभा चलिरहँदा पानी पर्न थालेपछि लामिछानेले आफनो सम्बोधनका क्रममा आँधीहुरी र बर्षाबाट प्रभावित र विचलित नहुने भन्दै सहभागीहरुलाई भने–यहाँ पानी पर्न सक्छ, आँधीहुरी आउन सक्छ रुझ्दै भिज्दै पनि भ्रष्टाचारीहरुलाई लखेटनु परेको छ ।
त्यसैगरी गौरादह बजारमा आयोजना गरेको सभालाई पनि सभापति लामिछाने, महामन्त्री मुकुल ढकाल, प्रमुख सचेतक सन्तोष परियार लगायतले सम्बोधन गरेका थिए । त्यसअघि विर्तामोडमा पनि रास्वपाले व्यापक जनहभागितामा पार्टीको सभा सम्पन्न गरेको थियो ।
