दमक/ कमल गाउँपालिकाको वडा नं ५ र दमक नगरपालिकाको वडा नं १ बीच भएर बग्ने रतुवा खोलामा दमक तर्फबाट भइरहेको तटबन्धन र कमल तर्फको भुभागमा हुन सक्ने सम्भावित जोखिमका बिषयमा दुवै तर्फका जनप्रतिनिधिहरुले स्थलगत जानकारी लिएका छन ।
निर्माणाधीन तटबन्धको कारण खोलाको धार कमल तर्फ एकोहोरिदा हुन सक्ने जोखिमका बिषयमा कमल गाउँपालिकाका तर्फबाट अध्यक्ष हुकुमसिंह राईको नेतृत्वमा वडाध्यक्ष लालबहादुर विष्टसहित आएको टोली र दमक नगर उपप्रमुख रेगिना भट्टराई, वडाध्यक्ष हरिप्रसाद न्यौपानेसहितको संयुक्त टोली तटबन्धनस्थलमा पुगेर त्यहाँ आवश्यक जानकारी लिएको हो ।
दुवै तर्फका जनप्रतिनिधिहरुबीच प्राकृतिक समस्याका रुपमा रहेको खोलाको कटान र डुबानबाट हुन सक्ने सम्भावित क्षति रोक्नका लागि अपनाउन सकिने उपायहरुका बारेमा विचार विमर्श भएको जनाइएको छ ।
