दमक/ कोशी प्रदेश सरकारको नयाँ मुख्यमन्त्रीमा दाबी पेश गर्न प्रदेश प्रमुख पर्शुराम खापुङले दलहरुलाई आव्हान गरेका छन ।
संविधानको धारा १६८ को उपधारा (२) बमोजिम कोशी प्रदेश सभामा कुनैपनि दलको स्पष्ट बहुमत नरहेको अवस्थामा प्रदेश सभामा प्रतिनिधित्व गर्ने दुई वा दुई दुई भन्दा बढी दलको समर्थनमा कोशी प्रदेश सभाका सदस्यहरुलाई २१ असार अपरान्ह ५ बजे सम्ममा मुख्यमन्त्रीमा दाबी पेश गर्न आव्हान गरेका हुन ।
नेपालका महान्यायधिवक्ताको समेत राय परामर्शमा संविधानको धारा १६८ को उपधारा (२) बमोजिम प्रदेशको मुख्यमन्त्रीका लागि खापुङले आइतबार त्यस्तो आव्हान गरेका हुन ।
यसअघि गएको पुषमा प्रदेश सरकार गठन हुँदा नेकपा एमालेका संसदीय दलका नेता कार्कीलाई मुख्यमन्त्रीमा नेकपा माओवादी, राप्रपा र जनता समाजवादी पार्टीको समेत समर्थन थियो ।
माओवादीले समर्थन फिर्ता लिएपछि १४ असारमा मुख्यमन्त्री कार्कीले संविधान बमोजिम प्रदेश सभामा विश्वासको मत मागेका थिए । १५ असारमा बसेको प्रदेश सभा बैठकमा मुख्यमन्त्री कार्कीले विश्वासको मतका लागि चाहिने मत संख्या ( प्रदेश सभा सदस्य ) नपुग्दा पदमुक्त हुनु परेको थियो ।
