काठमाडौं/ साहित्यिक पत्रकार संघले पाँचजना सर्जकहरूलाई सापस विशिष्ट सर्जक सम्मानद्वारा अभिनन्दन गरेको छ ।
अभिनन्दित हुनेहरूमा संस्कृतिविद् डा. पुरुषोत्तमलोचन श्रेष्ठ, चित्रकार प्रा. मदन चित्रकार, कवि ज्ञान उदास र कलाकारद्वय चैत्यदेवी सिंह तथा सन्तोष पन्त छन् ।
शनिबार संघका अध्यक्ष राधेश्याम लेकालीको सभापतित्वमा सम्पन्न कार्यक्रममा नेपाल ललितकला प्रज्ञाप्रतिष्ठानका पूर्व कुलपति के. के. कर्माचार्यको प्रमुख आतिथ्यता रहेको थियो ।
अभिनन्दित व्यक्तित्वहरुलाई सभाका सभापति राधेश्याम लेकाली तथा प्रमुख आमन्त्रित व्यक्तित्व के.के. कर्माचार्यले दोसल्ला ओढाएर ढाका टोपी र फूलको माला लगाइदिएर अभिनन्दनपत्र समर्पण गरेका थिए । सो अवसरमा व्यथित काव्य डायस्पोरा सम्मान २०८२ दीपा राई पुन (अमेरिका)लाई समर्पण गरिएको थियोे ।
संघका अध्यक्ष लेकालीले स्वागत मन्तव्य राख्दै कार्यक्रमको उद्देश्यमाथि संक्षेपमा प्रकाश पारेका थिए । वि.सं. २०२९ सालमा स्थापित साहित्यिक पत्रकार संघ विभिन्न जङ्घारहरू तर्दै आएको बताए । संस्थापक अध्यक्ष भवानी घिमिरेको स्मरण गर्दै उनले २०३८ सालदेखि कथा दिवस मनाउँदै आएको, २०६४ सालसम्म गाईजात्रा कार्यक्रमको आयोजना गरेको, हालसम्म धेरैजना स्रष्टाहरूको सम्मान, अभिनन्दन गरेको र हाल स्रष्टाहरूका कृतिहरूलाई अडियोमा ल्याउन थालेको बताए । समालोचक प्रमोद प्रधानद्वारा अभिनन्दित व्यक्तित्वहरूको संक्षिप्त परिचय दिइएको थियो ।
रेडियो नाटक, स्टेज प्रोग्राम, सिरियलमा छुट्टै पहिचान बोकेका पन्तले प्रतिस्पर्धाको युगमा आफूलाई अरुभन्दा अलग रूपमा प्रस्तुत गर्न सफल रहेको बताइयो ।
अभिनन्दित व्यक्तित्वहरूले पनि मन्तव्य राखेका थिए । नेपाल स्रष्टा समाजका अध्यक्ष श्रीओम श्रेष्ठ ‘रोदन’, कलाकार मदनदास श्रेष्ठ तथा इतिहासविद् प्रा.डा. सुरेन्द्र केसीले शुभकामना मन्तव्य राखेका थिए ।
कार्यक्रममा किरण खरेलको शब्द, चन्द्रराज शर्मा, शिवशंकरको सङ्गीत रहेको तारादेवीले गाएको गीत ‘आँखाहरूले रून नखोजे, ओठहरूले हाँस्न नखोजे जीवन कति सुन्दर हुन्थ्यो होला’ बोलको गीतलाई गायिका सरिता शाहीले मीठो लय र स्वरमा गाएर सुनाएकी थिइन्। अनामनगरस्थित डालो रेष्टुरेन्टमा भएको कार्यक्रममा संघकी कोषाध्यक्ष पद्मावती सिंहले धन्यवाद ज्ञापन गरेकी थिइन् भने कार्यक्रमको सहजीकरण साहित्यकार सविता श्रेष्ठ ‘बेहोसी’ले गरेकी थिइन्।
