दमक/ इलाम जिल्लाको माङ्सेबुङ–३, चुबुवा स्थित जनकल्याण प्राविमा बालबालिकाहरुलाई न्यानो कपडा वितरण गरिएको छ । कर्नर स्टोन फाउन्डेशन दमक–झापाको आयोजन तथा प्रायोजनमा
२ वर्षदेखि १३ वर्ष उमेर समूहका जम्मा ८० जना विद्यार्थीहरूलाई जाडो यामका लागि ज्याकेट, स्विटर, ट्राउजर तथा जाडो टोपी वितरण गरिएको विद्यालयका संस्थापक–प्रिन्सिपल युवराज गजमेरले जानकारी दिए । उनले कर्नर स्टोनको तर्फबाट प्रतिनिधित्व गर्दै प्रत्येक वर्ष पूर्वी नेपालका ग्रामीण तथा दुर्गम क्षेत्रका विद्यालयहरूमा यस प्रकारका सामाजिक सेवामूलक कार्यक्रम निरन्तर गर्दै आएको जानकारी दिए। गजमेरले भने
“हामी सबै मिलेर सर–सहयोग, हातेमालो गरे बिकटका नानीहरूले पनि सहज रूपमा पढ्न–लेख्न पाउने छन ।”
कार्यक्रममा सामाजिक व्यक्तित्व पास्टर राजकुमार राई, पास्टर हेमन्त सुब्बा, पास्टर राम राईको उपस्थिती रहेको थियो। साथै स्थानीय विद्यालयको तर्फबाट प्रधानाध्यापक मनकुमार राई तथा शिक्षिका अलिशा राई सहभागी थिए । कार्यक्रमको सभापतित्व विद्यालय व्यवस्थापन समितिका अध्यक्ष राम कुमारी लिम्बुले गरेकी थिइन् ।
यस कार्यक्रमले चिसो मौसममा विद्यार्थीहरूको स्वास्थ्य संरक्षणमा सहयोग पुर्याउनुका साथै समुदायप्रति सहकार्य र सेवाको सशक्त सन्देश प्रवाह गरेको स्थानीयहरूले बताएका छन्।
