झापा/ झापाको कमल गाउँपालिकाको २ नम्बर वडा कार्यालयले नयाँ शैक्षिक सत्र शुरु भएर पनि बिद्यालयको पठनपाठन सञ्चालन नभएको प्रति गुनासो आउन थालेको भन्दै ११ बैशाखदेखि अनिवार्य कक्षा सञ्चालन गर्न बिद्यालयहरुलाई पत्राचार गरेको छ ।
औपचारिक रुपमा वडास्थित सामुदायिक बिद्यालयहरुलाई पत्र लेखेर ११ वैशाखदेखि नियमित पठनपाठन सञ्चालन गर्न वडाध्यक्ष अशोक सुब्बाले निर्देशन गरेका हुन् । वडाध्यक्ष सुब्बाले हस्ताक्षर गरेर आज लेखिएको पत्रमा सो वडाका बिद्यालय क्षेत्रलाई शान्ति क्षेत्र घोषणा कार्यान्वयन गर्ने प्रतिबद्धतामा सर्वपक्षीय निर्णय भएको स्मरण समेत गराइएको छ ।
सो वडामा रहेका कमला मदन आश्रित स्मृति मावि, महेन्द्ररत्न मावि र ज्योती माविलाई पत्र लेखेर ११ वैशाखदेखि अनिवार्य कक्षा सञ्चालन गर्न निर्देशन दिइएको छ । गाउँपालिकास्थित शिक्षा समिति सदस्य समेत रहेका वडाध्यक्ष सुब्बाले भने– हामी पत्र लेख्ने मात्रै होइन कार्यान्वयन गराउनेमा पनि उत्तिकै जिम्मेवार छौं । भर्ना अभियानसँगै नियमित कक्षा सञ्चालन हुनुपर्छ ।
वडाध्यक्ष सुब्बाले अगाडी भने– निर्देशन नमान्ने बिद्यालय लाई एक्सन लिन्छौं । आन्दोलन गर्नु आफ्नो ठाउँमा छ तर जनताका छोराछोरी पढाउने स्कूल बन्दै गरेर बस्न मिल्दैन । आन्दोलनमा नजानु होइन जानु तर पठनपाठन रोकेर बिद्यार्थीको भविष्यमाथि खेलबाँड गर्न पाइँदैन ।
